الإيجار هيزيد 10 أضعاف و5 سنين مهلة لطردك.. اعرف تعديلات قانون الإيجار القديم

ناس كتير مستنيه التعديلات الجديدة على قانون الايجار القديم، خصوصا الملاك اللي بقالهم سنين في الازمة دي، لحد ما جه الرئيس عبد الفتاح السيسي وأمر بإصدار تعديلات جديدة على الإيجارات القديمة

خصوصا أنه مش منطقي في سنة 2025، ووسط الأزمة الاقتصادية اللي احنا فيها تلاقي شقة متاجرة ب50 جنيه، عشان كده مجلس النواب اتحرك وفي دور الانعقاد الحالي هيناقش القانون الجديد 

يعني المفروض ان دور الانعقاد العادى بدأ في شهر أكتوبر 2024 وهيستمر لمدة 9 شهور وبعد ما يخلص هيبدأ تنفيذ الحكم يعني ممكن يطبق في يونيو أو يوليو 2025.

واللي أكد الكلام ده هو رئيس مجلس الوزراء لما طلع من ايام وقال أن الحكومة خلاص بتنتهي من تعديلات قانون الإيجار القديم، تنفيذًا لحكم المحكمة الدستورية العليا، وطمن كل المواطنين وقالهم أن القانون القديم بصيغته الجديدة هيكون عادل في معالجة العلاقة بين المالك والمستأجر

كمان  المهندس طارق شكري، وكيل لجنة الإسكان في مجلس قال أن جلسات مناقشة مشروع القانون الجديد هتبدأ يوم الإثنين، وكشف مفاجآت كتير عن المشروع منها رفع قيمة الإيجار للوحدات السكنية المؤجرة بنظام الإيجار القديم، بحيث أن الإيجار مبقاش عن 1000 جنيه في المدن والأحياء، و500 جنيه في القرى، مع زيادة سنوية منتظمة بنسبة 15%

 وده هيكون خلال فترة انتقالية لحد ما يخلي الساكن الوحدة، ولما أتساءل المدة الانتقالية دي قد ايه قال إن مدتها خمس سنين ، وبعد ما الفترة دي تنتهي الشقة المتاحرة هترجع لمالكها الأصلي، إلا إذا اتفق الطرفين على تمديد العقد بس بشروط جديدة.

بس طبعا الكلام ده معجبش ناس كتير زي محمود عطية المحامي اللي شايف أن فترة 5 سنين ظالمة للمستأجر لأنه عاش في البيت ده طول عمره وصعب أن يخرج منه بسبب زيادة  قيمة الإيجار عليه، لكنه قال ممكن يحصل زيادة الإيجار بشكل يناسب الطرفين، زي اللي حصل في قانون إيجار المحلات التجارية لما حصلت الزيادة بنسبة معينة اتفق  عليها المالك والمستأجر وده ساعد على استمرار العلاقة وحل الإشكالية للمؤجر والمستأجر.

بس فيه ناس شايفة أن الالف جنيه مش كفاية لرفع قيمه الايجار ولا عجبهم كمان مدة ال5 سنين الفترة الانتقالية عشان شايفين أنها مدة كبيرة جدا، يعني مثلا مصطفى عبد الرحمن، رئيس ائتلاف ملاك العقارات القديمة وده قال أن أغلب ملاك العقارات المتضررين كانوا اتفقوا في وثيقة مشتركة،  أن مهلة الفترة الانتقالية تكوم 3 سنين، لان مهلة ال5 سنين طويلة جدا، خصوصا أن العقارات دي هتحتاج مدة تانية لإعادة صيانتها

واتكلموا كمان عن قيمة الإيجار واتفقوا  أن الإيجار القديم يكون  2000 جنيه بحد أدنى للمناطق الشعبية و4000 جنيه للمناطق المتوسطة و8000 آلاف للمناطق الراقية، وده مش رقم كبير خصوصا في الوضع الحالي والملاك بيعتبروا أن الإيجارات دي هي مصدر رزقهم الوحيد 

انت بقى قولنا إيه رأيك في قانون الايجار القديم، وايه التعديلات اللي شايف انها لازم تكون موجودة في القانون الجديد؟