عنده سلسلة مطاعم بيتزا في النمسا.. مين هو سليمان الصادي!

سليمان الصادي اكيد سمعت الاسم ده في يوم من الايام أو عدى عليك مرة ولا اتنين اصل ده مش رجل اعمال عادي، لا ده عالمي فعلا وحكايته لازم تتعمل كتاب عشان الكل يتعلم منها 

سليمان ده يا سيدي تقدر تقول عليه أن كل الظروف كانت ضده بس هو اتحداها ووصل بشطارته ومجهوده، بعد ما كان يدوبك فلاح بسيط في قرية من القرى المصرية بقي من اشهر رجال الأعمال في العالم كله بعد ما سافر للأردن وهناك شق طريقه

بس طبعا في البداية الموضوع كان صعب مكنش لاقي ولا فرصة شغل في الاردن، وفكر ساعتها يسافر في اي مكان تاني  و بمساعده قرايبه راح بيروت واشتغل عامل نظافة في فندق ولحسن حظه الفندق كان موجود في ارقى مناطق بيروت وفضل سنة شغال هناك اتعلم تقريبا كل حاجة وقدر أنه يكسب ثقة مديره، لدرجة أن قاله لو اشتغلت في اي فندق تاني هقتلك من كتر حبه فيه 

بس هو كان طموح وقرر أنه يسافر لبرلين بس للاسف عشان جوازه كان منتهي استقبلوه بشكل قاسي واستني كتير جدا في المطار لحد ما اترحل لبرلين الغربية وفضل يستني كتير هناك لحد ما لقى سخص عربي ساعده وخلاه يشتغل في مطعم ايطالي هناك.

ورغم أن مكنش ليا في الطبخ قال لصاحب المطعم أنا بعرف أعمل بيتزا، لانه كان فاكرها زى الرقاق فى الفلاحين، بس لما  دخل المطبخ معرفش يعمل اي حاجة، وهنا صاحب المطعم كان هيطرده

بس هو حاول معاه  وقاله أنا بقالى 6 شهور من غير شغل، وجربنى ويشطارته قدر أنه يتعلم كل حاجة من صاحب المطعم من الألف للياء، وفعلا صاحب المطعم اعجب بيه واستمر في الشغل معاه

بس بعد كده سافر للنمسا واشتغل فى مطعم بيتزا،. لمدة 6 سنين، بس المره دي هو اللي علم اكتر من 100 شخص اصول الشغل أنه ودلوقتي بقى فيه منهم 60 شخص  عندهم مطاعم كبيرة في النمسا، ولحد دلوقتي بيعلم ناس عشان كده بيقولوا عليه صاحب مدرسة خاصة فى تصنيع بيتزا.

 الصادي بعد كده فكر يشتغل حر وبدأ بكشك يدوبك مساحته 6 متر كان بيعمل فيه البيتزا فى مدينة ملاهى،  في الاول الكل اتريق عليه ومحدش ساعده بس الكشك ده بشطارته بقى  13 مطعم للبيتزا في النمسا، معظمهم شغال فيه مصريين

والحقيقة أن سليمان قدوة لشباب كتير عشان كده قصته تستحق أنها تتطبع ويتعلم منها الكل.