شبه البطاطس وبـ2000 جنيه.. الترفاس أغلى نبات في مصر!

من وقت للتاني بنسمع عن نبات غريب ظهر في صحراء ولا محافظة من محافظات مصر، منهم الكمأ أو الترفاس، النبات ده يعتبر من اغرب النباتات اللي هتشوفها في مصر مجرد ما هتشوفه هتفتكره بطاطس بس لو روحت تشتريه هيصدمك سعره لان الكيلو منه بالفين جنيه

طب ليه؟

الحقيقة أن فيه اكتر من سبب مخلي سعر النبات ده في العالي أولهم أن النبات ده اصلا مش بيتزرع بالطريقة التقليدية هو اصلا محدش بيزرعه ده بيطلع لوحده كده مجرد ما المطر ينزل في صحراء مطروح، من غير شتلات ولا بذور 

وعشان المزارعين يحصدوه فده بقى قصة تانية لوحدها فعلا حصاده متعب جدا لانك محتاج تحفر في الأرض وتدور كويس اوي عشان تعرف مكانه، وفوق كل ده فوائده الصحية اللي ملهاش اخر كل ده مخلي سعره يوصل ل٢٠٠٠ جنيه واكتر 

واحد من التجار قال إن الترفاس نوعين  الأبيض و سعر الكيلو منه 1000 جنيه، أما الترفاس الأسود فده الأغلى بس سعره مش مستقر بسبب قلة الحصول عليه، يعني ممكن تلاقي الكيلو منه بيتباع ب1500 جنيه وأوقات تانية ب2000 جنيه وأكثر 

بس حالة تصديره أو بيعه لزباين من الخليج ممكن يزيد سعره 100 دولار حسب النوع والحجم والكمية، يعني 5 آلاف جنيه تقريبا، لا وكمان ممكن سعره يزيد اكتر من كده في المواسم اللي مفيهاش أمطار رعدية كبيرة

بس خليني اقولك أن الترفاس ده موجود بأنواع كتيرة في دول الخليج العربي، وممكن تلاقي انواع موصلتش مصر لحد دلوقتي بس الأنواع دي غالية جدًا، بسبب القيمة الغذائية العالية

تاجر قال إن الترفاس من كام سنة كان بـ400 جنيه، النهاردة بقى بأسعار مضاعفة، لأنه مش موجود غير في مناطق محدودة بمصر زي السلوم ومطروح وسيوة والبدو هما اللي بياخدوه ويبعوه

وعلى فكرة النبات ده مكنش حد يعرفه غير في أوائل التسعينيات لما كانت بتيجي قوافل سفارى  للخليجيين، وهم اصلا اللي اكتشفوا وجود الترفاس، عشان كده الأهالي عرفوه وبدأو يحصدوه

كمان بداو في تصديره للكويت ودول الخليج، بكميات قليلة وبأسعار كبيرة، وبقى مصدر دخل لشريحة من المواطنين، ويعتبر السوق الخليجى هو السوق الأكثر شراء للترفاس وأسعاره دلوقتي فى الخليج تتراوح بين 200 و300 ريال سعودى، وفى بعض حالات التصدير بيوصل سعر الكيلو 100 دولار.