هتشحن عربيتك في 3 دقائق.. أول محطة تبديل بطاريات في الشرق الأوسط

وسط انتشار العربيات الكهربائية وتردد ناس كتير يشتروها ولا لا خصوصا أن محطات الشحن الخاصة بيها مش كتير، ظهرت أول محطة لتبديل بطاريات العربيات الكهربائية لاول مرة في الشرق الاوسط 

المحطة دي بتقدمها شركة نيو في الامارات بس خالي بالك دي مش اي محطة لا دي.حاجة كده فوق الخيال، كفاية أن اقولك انها هتغيرلك البطارية وتفحص كل عربيتك في 3 دقائق بس 

لا وايه انت مش محتاج اصلا تنزل من عربيتك حتى كل ده بيتم وانت قاعد جوا العربية وبتتحكم فيه من خلال شاشة ذكية موجودة في العربيات الكهربائية 

بس ياترى ليه المحطة دي بالذات مختلفة عن اي محطة شحن تانية ؟

اقولك يا سيدي، اولا المحطة معمولة بتصميم ذكي وصغير  بيستوعب 21 بطارية، وقادرة على تنفيذ 408 عملية تبديل بطاريات يوميا

كمان المحطة بتوفر  فحص شامل لحالة العربية مع كل عملية تبديل، وده بيخليك تضمن سلامة عربيتك و أعلى معايير الأمان، وكل ده بيتم في دقايق بسيطة جدا مش بتتعدى ال3 دقايق 

وفوق كل ده نوع البطارية نفسها الي بيبدلوها من احسن الخامات، الهدف من كل ده بقى هو نشر العربيات الكهربائية وتشجيع الكل على شرائها 

وعموما ده مش غريب على شركة نيو الصينية صاحبة المحطة دي اللي سجلت أكثر من 67 مليون عملية تبديل ناجحة لحد فبراير 2025، وخكت أكثر من 1,650 براءة اختراع في المجال ده

لا ولسه شركة نيو الفترة الجاية هتوسع شبكة محطات تبديل البطاريات، عشان تسهل على  الاشخاص امتلاك واستخدام العربيات الكهربائية من غير ما يقلقوا من شحن ومدى استخدام البطارية 

الشركة أكدت على  التزامها بتوفير تقنيات متطورة عشان تدعم مستقبل النقل المستدام، وتخلي التنقل الكهربائي يشتغل بسهولة وكفاءة عن أي وقت سابق.

وعلى فكرة سبق وشركة نيو كانت أعلنت عن توسيع محطات الشحن عشان يوصلوا ل3آلاف و700 محطة لاستبدال البطاريات بحلول نهاية عام 2025، بعد ما حقّقت مبيعات العربيات الكهربائية قفزة كبيرة عندها

ودلوقتي قولنا فكرت تشتري عربية كهربائية قبل كده؟