الواحد بمليون جنيه والخلايجة بيشتروه بأعلى سعر.. ليه مصر حرمت تجارة الصقور؟
انواع كتير من الطيور والحيوانات مصر قررت انها تحرم صيدها عشان تحافظ على الأنواع دي من الانقراض، من ضمن الأنواع دي هي الصقور مصر بقالها سنين محرمة صيدها لمنع انقراضها
رغم أن البيزنس ده بيوفر 100 مليار دولار سنويا على المستوى العالمي وحاليا فيه دول كتير شغالة فيه، منهم الصين اللي بتفكر دلوقتي تسيطر على 10% من السوق العالمي، ده غير أن فيه 14 دولة شغالة فيه، ودول الخليج لوحدها بتستثمر 50 مليار دولار سنويا في الصقور، لأنها اكتر دول مهتم بالتجارة دي
خالد نوبي، المدير التنفيذي للجمعية المصرية لحماية الطبيعة، اتكلم عن الموضوع ده وقال أن مصر عندها فرص تجمع فيها عائدات كبيرة توصل ل5 مليار دولار سنوياً، من تجارة الصقور، بشرط تقنينها ومتعتمدش على الصيد المستمر، بس.طبعا ده يكون مع تهجين السلالات النادرة وزيادة أعدادها عشان ميحصلهاش انقراض
وقال أن تجارة الصقور في مصر رغم مخالفتها للقانون، تعتبر تجارة مربحة لأصحابها، مش للدولة لأنها تعتبر تجارة في السر وبينما بيعها لدول الخليج وبتحتل المكانة الأولى عندهم، عشان كده طلب بتقنينها بشكل رسمي
خالد بن ضحي، واحد مستثمري قطاع الصقور الدوليين ، قال أن قطاع الاستثمار في الصقور عليه اقبال كبير في دول الخليج، عشان كده فيه دول عندها صناعات بتعتمد في الأساس على تجارة الصقور ، زي ( صناعات الأعلاف ، ومستلزمات الصقورة ومعارض الصقور )
و قال ان حجم الصناعات المعتمدة علي صيد و تجارة الصقور بتوصل ل110 مليار دولار، و عائداتها 180 مليار دولار، وان سعر الصقر الواحد اتضاعف 3 مرات في الخليج، لان الجرام منه بيساوي جرام الدهب
وخليني اقولك أن قبل ما التجارة دي تتمنع بشكل رسمي في مصر كان فيه ناس حرفيا بيكسبوا منها دهب وخصوصا الناس الموجودين في مرسى مطروح وشمال سيناء كانوا بيبعوا الواحد بمليون جنيه
وده اللي أكده واحد من الصيادين لما قال إنه اصطاد صقر من سلسة «الشاهين» بمدينة «الضبعة»، واشتراه واحد من الخليجيين بمبلغ مليون و100 ألف جنيه، لانه من أجود أنواع الطيور اللى تم صيدها فى محافظة مطروح خلال الفترة الأخيرة
والمفاجأة بقى أن المشتري ده طلع انصح من الصياد نفسه لأنه باعه بمبلغ 3 مليون جنيه، يعني الأرباح عدت ال100%، الراجل ده باعه لواحد من أثرياء الخليج عشان يستخدمه فى صيد طيور «الحبارى»، اللي لحومها من اخسن وأجود لحوم الطيور، ده غير أن الصقور عموما الصيادين بيستخدموها فى صيد طيور «الكروان»
بس تفتكر ممكن يجي اليوم والتجارة دي ترجع تاني في مصر؟