أرخص من الحديد بـ40%.. الحديد الفايبر بديل جديد للحديد التقليدي!

من بعد ارتفاع أسعار مواد البناء وخصوصا الحديد اللي وصل للأرقام فلكية وناس كتير بقت تدور على بدايل ليه تكون بنفس الجودة وفي نفس الوقت سعرها ارخص.

واخيرا وبعد بحث كتير اكتشفوا الحديد الفايبر وده يعتبر أقوى من الحديد المسلح 3 مرات على الأقل، لا وايه أسعاره بأقل من سعر الحديد العادي ب40% يعني مفيش حاجة احسن من كده.

وفوق كل ده أسياخ الفايبر المسلح صناعة روسية يعني مصنوع باعلى جودة ومفيش قلق منه نهائيا، عشان كده دول كتير بدأت تعتمد عليه  في البناء، بسبب مميزاته أهمها انه أخف وزن من الحديد بـ9 مرات، كمان مش بيصدي ابدا ومش موصل للكهرباء، كمان يعتبر  صديق للبيئة، لانك ممكن ترممها تاني وتعيد إنتاجها، و بتتحمل العوامل الخارجية زي الرطوبة الشديدة والحرارة

والأهم من ده كله ان عمر أسياخ الفيبر جلاس 4 أضعاف عمر الأسياخ المصنوعة من الحديد، كمان مش بتكون حشرات أو بكتيريا،  أسياخ الفيبر جلاس كمان بتكسر بكل سهولة عند استخدامها عشان تقدر توزعها زي مانت عايز مكان البناء يعني مش هتحتاج ماكينة مخصوصة عشان تقيمها

 وعلى فكرة الخديد بيستخدم في كل انواع البنا زي الأسقف والأعمدة والمسطحات الكبيرة والموانئ والمراسي

و اسياخ الفايبر مش حاجة جديدة ولا حاجة ده موجود من زمان بس بعد ارتفاع أسعار الحديد الناس بقت تستخدمه في البناء 

كل ده خلى أحمد الزيني، رئيس الشعبة العامة لمواد البناء بالاتحاد العام للغرف التجارية، قال إننا لازم  نهتم بصناعة الحديد الفايبر في مصر ونهتم بتصنيعه عشان نخلق منافسة حقيقية بين مصانع حديد التسليح، لان ده هيشجعهم على تخغيض الأسعار ويخلي المصانع تقلل هامش ربحها، بدل ما الناس تتجه لحديد الفايبر اللي سعره اقل منه بنسبة 40%.

وقال ان الحديد الفايبر هيساهم بشكل كبير في خفض أسعار المباني، والوحدات السكنية، و الدولة هتبدء تستخدمه فيما بعد في المشروعات الكبيرة والمشروعات القومية لضغط التكلفة.

وكمان قال إن أهم ميزة في النوع ده أنه بيتصنع حسب الاحتياج من حيث المقاس لكل مبنى والمواصفات اللي بيحتاجها المبنى، والفرق بين حديد التسليح والفايبر أن التسليح بيتصنع من الصلب اما الفايبر من مواد صناعية بتتحدد حسب الاحتياج والمقاس

ودلوقتي قولنا رايك ايه في حديد الفايبر ممكن تستخدمه في بيتك؟