هتشتريه بـ5 جنيه وبـ17 جنيه هتستثمر فيه.. طرح وحدة دهب بـ5 جنيه!

مش معنى أن الدهب وصل ل5000 جنيه انك تفقد الامل وتفتكر انك مش هتعرف تشتريه وتستثمر فيه، ده بالعكس انت من دلوقتي تقدر تستثمر في الدهب حتى لو معاك 5 جنيه بس، ايوة زي ما بقولك كده

واللي أكده الكلام ده هو سامح الترجمان، الرئيس التنفيذي لشركة "إيفولف للاستثمار القابضة"، لما طلع من ساعات زقال أن منصة "منجم" التابعة للشركة هتبدأ إتاحة شراء وحدات صغيرة جداً من الذهب مباشرة في مصر بسعر يبدأ من 5 جنيه للوحدة، انت متخيل 5 جنيه هيخلوك تشتري دهب وتستثمر فيه كمان 

 سامح قال ان الهدف من إطلاق المنتج ده إتاحة آليات للاستثمار في الذهب بأسعار قليلة تناسب كل الشرايح، بس عموما المنتج منزلش السوق هو لسه في مراحل الاختبار عشان كده منقدرش نحدد حجم المبيعات المستهدفة في الفترة الحالية 

بس الموجود دلوقتي وتقدر تستثمر فيه حتى لو معاك 17 جنيه بس، هي صناديق الاستثمار في الدهب، ودي بقى صناديق اطلقتها هيئة الرقابة المالية المصرية، كوعاء استثماري متخصص للاستثمار في الذهب عن طريق طرح وثائق يتم الاكتتاب فيها من خلال البنوك وشركات مرخصة 

ميزة الصناديق دي بقى انك تقدر تستثمر فيها من اول 17 جنيه، كمان بتسمحلك بالاسترداد النقدى أو العينى في اي وقت وده اللي بيميز الصندوق عن الشهادات البنكية التقليدية وهو سهولة السحب، تحت إشراف الهيئة العامة للرقابة المالية عشان تضمن حماية جميع حقوق المواطنين.

وانت عندك بقى 3 صناديق اختار فيهم اللي يعجبك اول صندوق هو صندوق اي زد، سعر الوثيقة فيه 17 جنيه بس الحد الأدنى للأكتتاب 100 وثيقة يعني 1700 جنيه تقريبا، مواعيد الاكتتاب فيه بتكون من يوم الاتنين للخميس 

تاني صندوق هو صندوق الدهب اللي بتديره شركة الأهلي لإدارة الاستثمارات المالية وإيفولف للاستثمار في الذهب، سعر الوثيقة فيه 126 جنيه وحد أدنى للاكتتاب 10 وثائق يعني 1260 جنيه

تالت صندوق هو سبايك سعر الوثيقة 100 جنيه وحد أدنى للاكتتاب 10 وثائق يعني الف حنيه، ولو انت عايز تستثمر في اي صندوق فيهم لازم تفتح حساب في اي شركة بتتعامل مع الصناديق وتملى استمارة بعدين تحدد المبلغ اللي هتستثمر فيه

ودلوقتي قولنا ممكن فعلا يجي اليوم ونشتري دهب ب5 جنيه.. ورأيك ايه في صناديق الاستثمار في الدهب شاركنا بتعليقك