1.8 مليار فقط.. انخفاض تاريخي لإيرادات قناة السويس.. والمصريون بالخارج يعوضون الفجوة
في 6 شهور فقط، قناة السويس خسرت كتير.. بس المصريين في الخارج عوضوا الخسارة. تعالوا نشوف التفاصيل بالأرقام.
اضطرابات البحر الأحمر عطلت الترسانة الدولارية لقناة السويس.. إيرادات القناة انخفضت بنسبة صادمة 62.3% في رسوم العبور، وكمان عدد السفن قلت بنسبة 52.2%..
طيب الإيرادات وصلت كام؟
الإيرادات وصلت 1.8 مليار دولار بس في 6 شهور، مقارنةً بـ4.8 مليار دولار في نفس الفترة من بداية العام المالي 2023/2024، يعني خساير تقيلة تقدر بنحو 3 مليارات دولار.
البنك المركزي قال إيه؟ أرجع التراجع للتوترات المستمرة في البحر الأحمر، لأن شركات شحن كتير حولت مسارها بعيد عن قناة السويس.. الحرب في غزة أثرت كمان.. قبل الحرب، كانت القناة بتدخل 4.8 مليار، إنما دلوقتي الأرقام اتغيرت كتير.. الحمولة الصافية نفسها انخفضت بنسبة 69.2%، يعني بدل ما كنا بننقل ملايين الأطنان، بقينا أقل بكتير.
طيب.. إيه اللي عوض الخسارة دي؟
تحويلات المصريين العاملين بالخارج. مفاجأة بالأرقام: تحويلات المصريين زادت 80.7%، وسجلت 17.1 مليار دولار خلال 6 شهور بس، مقابل 9.4 مليار في نفس الفترة السنة اللي فاتت.. وكمان، السياحة دعمت الإيرادات المصرية والناتج المحلي. الإيرادات السياحية زادت بنسبة 12.4% وسجلت حوالي 8.7 مليار دولار، بفضل زيادة عدد الليالي السياحية لـ93.5 مليون ليلة.
