300 فرصة استثمارية بـ 12 مليار جنيه.. أشرف صبحي قصة الرياضي اللي بيفكر بلغة البيزنس
لما تيجي تبص على قصة الاستثمار الرياضي في مصر السنين اللي فاتت، هتلاقي اسم دايما بييجي في الصورة، الدكتور أشرف صبحي، وزير الشباب والرياضة.. الراجل ده مش مجرد وزير والسلام، ده عقلية استثمارية من الطراز الرفيع.. وزير بدرجة مستثمر بيفكر إزاي الرياضة تكون صناعة تانية تدخل مليارات للبلد وتخلق فرص للشباب.
أشرف صبحي مش داخل المجال بالصدفة، ولا هو بعيد عن المطبخ الرياضي، لأ، ده راجل أكاديمي جامد، واخد دكتوراه في الإدارة الرياضية من جامعة هيلموت شميدت في ألمانيا، ومعاه دبلومة تانية من أمريكا.. راجل دارس وفاهم إدارة المنشآت والتسويق الرياضي على أصوله، وكمان اشتغل زمان مساعد لوزير الرياضة ومدير تنفيذي للمجلس القومي للرياضة، يعني فاهم الشغلانة من تحت لفوق.
ومن ساعة ما بقى وزير وهو حاطط هدف قدامه «إزاي يحول الرياضة من رفاهية لمكينة اقتصادية حقيقية؟» وبالفعل، تحت قيادته، مصر دلوقتي فيها أكتر من 300 فرصة استثمارية رياضية بقيمة حوالي 12 مليار جنيه، وده رقم مش قليل خالص.. حاجات زي إنشاء أكاديميات رياضية، ملاعب خماسية، مجمعات ترفيهية ورياضية، مراكز تدريب، وكل ده بالشراكة مع القطاع الخاص
الراجل مش بيهزر، لما حط خطة الأكاديميات كان هدفه واضح «نجهز جيل محترف، ونشغل شباب، وندخل فلوس، ونخلق سوق محترم للرياضة في مصر».. عشان كده بقى فيه دلوقتي أكاديميات في الكورة والطايرة والسلة وكمان الرياضات الفردية زي السباحة وألعاب القوى
كمان فاهم كويس قوي قيمة الرعاية والتسوييق، وعمل نقلة محترمة في إدارة حقوق الرعاية للبطولات والأندية وبقينا نشوف بطولات عليها رعاة كبار ومداخيل مالية قوية بتدعم الاتحادات والأندية من غير ما نستنى دعم حكومي
ده غير طفرة البنية التحتية اللي حصلت من ملاعب جديدة وصالات مغطاة ومجمعات رياضية عالمية بمواصفات دولية.. خلى مصر بقت جاهزة فعلا إنها تستضيف بطولات عالمية مش إقليمية بس.. وده جزء من حلمه الكبير إنه يشوف مصر تستضيف كأس العالم لكرة القدم والأولمبياد.. حلم ضخم؟ أيوه.. بس اللي بيتعمل على الأرض بيقول إنه حلم ممكن
ومش مركز بس على القاهرة.. بالعكس، نشر الاستثمار الرياضي في المحافظات بقى توجه أساسي، بحيث الرياضة توصل لكل بيت، والفرص توصل لكل شاب في مصر، من أسوان لإسكندرية.
أشرف صبحي بيشتغل بفكر اقتصادي حديث وهة أن الرياضة مش بس منافسة وميداليات، دي اقتصاد وتنمية ومصدر عمل ودخل، فكرة قاطرة التنمية الاقتصادية دي مش مجرد كلام، ده تخطيط عملي بيتنفذ.. الرياضة مع أشرف صبحس بقت دلوقتي بتخلق فرص وبتحرك قطاعات تانية زي السياحة والفنادق والنقل والإعلام والتعليم.
وزي ما هو شايف الرياضة مستقبل اقتصادي، كمان شايف دورها الاجتماعي كويس أوي فبدل ما الشباب يضيع وقته في الفراغ، يلاقي في الرياضة حلم ومستقبل، يقل العنف والمخدرات، ويزيد الانتماء والطموح.
وده كله بيتبني تحت سقف الجمهورية الجديدة اللي بتحلم بدولة حديثة وقوية، والشغل اللي بيحصل دلوقتي بقيادة الدكتور أشرف صبحي جزء مهم جدا من الحلم ده.. راجل شايل ملف تقيل وعنده رؤية وعلم وخبرة عملية ومؤمن إن الرياضة مش بس بتصنع أبطال، دي بتصنع اقتصاد قوي وحياة أفضل لملايين الشباب.
باختصار، أشرف صبحي بيحفر لنفسه مكانه في تاريخ الرياضة المصرية، مش بس كوزير.. لأ كواحد من الناس اللي حولوا الحلم الكبير لحقيقة ماشية قدام عيونا
وفي الآخر يهمنا رأيك .. هل شايف أن الدكتور أشرف صبحي هيحقق حلمه وحلم مصر في استضافة الأولمبياد أو كأس العالم؟ وهل مصر أصبحت مؤهلة لدا فعلاً؟
