روسيا اتفقت مع الصين.. وعملة «البريكس» جاهزة للإطاحة بالدولار

البريكس أسس بنك عالمي جديد .. والدنيا بتتغير بسرعة، والعالم بقى بيتقلب فوق تحت.. والنهائي كمان 4 سنين بعد ولاية ترامب.

الصين وروسيا خلاص بقوا صاحب وحبيب، وعمالين يبنوا في تحالف قوي مالوش زي، والرسالة كانت واضحة جدًا لكل الدنيا “احنا بنجهز لعالم جديد مش هيكون فيه قطب واحد متحكم في مصيرنا”

النهاردة نكلمكم عن تحالف صيني روسي بيستعد يقلب الترابيزة على أمريكا، بقيادة أقوى اتنين في الشرق، في وقت رجع فيه ترامب للبيت الأبيض، ناشر معاه رياح الحروب الاقتصادية من أول وجديد.

في البداية خلينا نحكي الحكاية من الأول.. الصين وروسيا بقوا قريبين من بعض أكتر من أي وقت فات.. رئيس الصين، في قمة عيد النصر اللي اتعملت عند بوتين، قالها صريحة قدام العالم كله: "احنا داخلين على عالم متعدد الأقطاب، مش قطب واحد ماسك كل حاجة بإيده زي زمان.

ترامب، اللي رجع رئيس في 2025، أول حاجة عملها إنه أعلن عن فرض رسوم جمركية تصاعدية على المنتجات الصينية، بدأت بـ10%، وبعدها بأسبوعين وصلت لـ25%، وقبل نص أبريل 2025 كانت عدت 145% على بعض السلع.
وقال يومها في خطاب ناري: “ده يوم التحرير الأمريكي من غزو الصين الاقتصادي”، الصين طبعًا مرضيتش تسكت، وردت بنفس العنف، وفرضت رسوم على الواردات الأمريكية وصلت 125%، يعني حرب تجارية مولعة بكل معنى الكلمة

الرسالة النهاردة بقت واضحة: يا إما تركب الموجة الجديدة، يا إما تغرق.. العالم اللي كان كله بيبص لواشنطن كأنها العاصمة الرسمية للكوكب، بدأ يبص النهارده لموسكو وبكين

وفي ظل كل ده، مش بعيد نلاقي تحالف بريكس مش بس بيطلع عملة موحدة، ده كمان بيأسس بنك عالمي جديد، ومنظومات دفع إلكترونية خاصة بيه، ويقول لأمريكا: خليكي في حالك، من خلال تكنولوجيا البلوكتشين لضمان السرعة والأمان، وتمكن الدول الأعضاء من التجارة بينها بدون وسيط خارجي كمان هتحميها من العقوبات الاقتصادية الأمريكية

وده اللي مخوف الغرب.. لأن لو بريكس نجح في إنه يعمل عملة قوية، ويجمع حواليه الدول اللي زهقت من سيطرة الدولار، مش هيكون بس تغيير اقتصادي، ده هيكون زلزال سياسي يهز عروش

وسط كل ده، البريكس، التحالف اللي بيضم روسيا والصين والهند وجنوب أفريقيا والبرازيل، رجع أقوى من زمان، والأهم من ده كله، بدأوا يحطوا اللمسات الأخيرة على مشروع العملة الموحدة بتاعتهم، عشان يكسروا سيطرة الدولار اللي بقالها 80 سنة ماسكة العالم من رقبته.

الموضوع مش هزار.. البريكس مش بس بيخططوا لعملة موحدة، دول كمان بيوسعوا شبكة الدفع بتاعتهم، خاصة مع انضمام دول مصر والسعودية والإمارات.

طب ليه كل ده بيحصل؟

لأن الصين وروسيا شايفين إن اعتماد العالم كله على الدولار الأمريكي بيدي أمريكا قوة ضخمة مش عادلة، وإن لازم العالم يتحرر اقتصاديًا زي ما تحرر سياسيًا بعد الحرب العالمية

الأزمة مش بس اقتصادية... دي كمان حرب على من يحكم النظام العالمي الجاي.. هل أمريكا تفضل ماسكة كل حاجة زي زمان، ولا العالم كله هيبقى فيه مراكز قوة جديدة زي البريكس؟

الصين النهاردة مش بس بتنتج إلكترونيات وملابس دي بقت بتقود الذكاء الاصطناعي، والروبوتات، والتكنولوجيا الخضراء وروسيا كمان بتمد تحالفهم بقوة الطاقة والمعادن النادرة، اللي هي عناصر أساسية لأي اقتصاد متطور.

من ناحية تانية، ترامب مش ناوي يسيبها تعدي بسهولة، بيهدد بعقوبات ضخمة على أي دولة تحاول تتخلى عن الدولار، وكمان بيهدد أوروبا نفسها لو قربت تدعم مشروع البريكس الجديد

السؤال اللي بيطرح نفسه دلوقتي هل البريكس هينجحوا فعلاً يطلقوا عملة موحدة ويغيروا شكل العالم الاقتصادي؟ ولا ترامب هينجح بالكروت اللي معاه ويرجع أمريكا تمسك العالم بإيد من حديد زي زمان؟