عنده 16.5 مليار دولار.. الوليد بن طلال جاب فلوسه منين؟
مين فينا ميعرفش الوليد بن طلال أغنى رجل في السعودية وفي الوطن العربي كله، الراجل اللي قدر أنه يشتغل في كل حاجة ويعمل ثروة تعدي مليارات
وعشان كده مجلة فوربس أعلنت رسميًا إن الأمير السعودي الوليد بن طلال دخل من جديد قائمة أغنى أغنياء العرب سنة 2025، واحتل المرتبة 128 عالميا بثروة تتعدى الـ16.5 مليار دولار
بس ياترى إزاي الوليد بن طلال جمع كل الثروة دي؟ وايه اهم الاستثمارات الي اشتغل فيها؟
اقولك، الوليد بن طلال بدأ مشواره الاستثماري من زمان، وحقق نجاحات ضخمة في مجالات كتير، منها البنوك، والعقارات، والفنادق، وحتى التكنولوجيا والطيران
بس بداية استثماراته الكبيرة كانت في سيتي جروب سنة 1991، واللي مع الوقت بقت حصته فيها وصلت ل10 مليار دولار، مش بس كده ده كمان عنده نسبة 16.2٪ من البنك السعودي الفرنسي.
والأهم من ده كله بقى أن عنده حصة كبيرة في شركة المملكة القابضة، لدرجة ان 40٪ من ثروته جاية منها، الشركة دي عندها استثمارات في كل حاجة تتخيلها، وبسببها عمل شراكة مع إيلون ماسك في شركة xAI للذكاء الاصطناعي، وساهم بنسبة ضخمه في منصة X (اللي كانت تويتر).
الوليد كمان بيستثمر في قطاع الضيافة، اللي بيشكل حوالي 30.8٪ من استثماراته، وعنده نسبة23.7٪ في شركة فورسيزونز، و6.8٪ في سلسلة فنادق Accor
الوليد عنده استثمارات كبيرة في برج المملكة، وبيمول مشروع برج جدة، اللي هيكون أطول برج في العالم لما يخلص، وكمان عنده حصة 37.2٪ من طيران ناس، اللي ناوي يطرحه في السوق السعودية بـ2 مليار دولار على الأقل
وعنده كمان نسبة 1.5٪ في شركة Snap وده جزء من تنويع استثماراته.
سر من اسرار نجاح الوليد بن طلال هو أعماله الخيرية اللي بدأت من أكتر من 40 سنة لملأسس مؤسسة الوليد للإنسانية، اللي اشتغلت على توفير بيوت للناس المحتاجة، وتوفير وسائل النقل والمواصلات للمناطق البعيدة، ووفرت كورسات تعليم وتدريب مهني للشباب علشان يشتغلوا ويحققوا دخل.
وسبق والوليد اعلن أن المؤسسة صرفت أكتر من 4 مليار دولار على أكتر من 1000 مشروع في 164 دولة حوالين العالم مش بس في السعودية
يعني مش بس أغنى رجل أعمال عربي ده كمان رجل خيري وعنده قناعة أن الخير اللي هو فيها الناس الغلابة ليهم حق فيه عشان كده بينجح كل سنة اكتر من السنة اللي قبلها
ودلوقتي قولنا عملت ثروة من شغلك قد ايه.. شاركنا بتعليقك!