الحكومة تعلن بيع شركة بسكو مصر رسميا.. مين اللي اشتراها!

النهارده حصلت صفقة كبيرة في البورصة المصرية الكل بيتكلم عنها، شركة نايل فالي أعلنت رسميا استحوذها على بسكو مصر بالكامل، يعني اشترت كل أسهم الشركة

الصفقة كانت لشرا 165 مليون سهم بسعر 1.46 جنيه للسهم يعني الصفقة كلها كانت قيمتها  241 مليون جنيه

وده يجي بعد ما أعلنت البورصة من شهر تقريبا تقديم شركة نايل فالي بعرض شراء اجباري للاستحواذ على الشركة المصرية للاغذية - بسكو مصر، لشراء  عدد 165.2 مليون سهم وبنسبة 100% من أسهم الشركة المصرية للأغذية  أو بسكو مصر  وبحد أدنى للتنفيذ نسبة 51% من الأسهم، بسعر 1.46 جنيه للسهم الواحد.

وعلى فكرة بسكو مصر كان اسمها اصلا الشركة المصرية للصناعات الغذائية واتاسست سنة ١٩٥٧م، وكانت ساعتها المصدر الرئيس لإمداد الجيش والمدارس الحكومية باحتياجاتهم من الأغذية السريعة، ولحد دلوقتي منتجاتها مغرقة السوق المصري، يعني بقالها 80 سنة تقريبا في السوق المصري محققة نجاح محصلش طول الفترة دي

أما بقى بالنسبة لشركة نايل فالي فدي شركة إماراتية وعندها علامات تجارية كتير زي سمنة كريستال وهلا والهانم، بس بعد صفقة الاستحواذ بقى عندها كمان بسكويت لوكس ونايس ومعمول وكوكو لافرز

وخليني افكرك أن مجموعة هائل سعيد أنعم وشركاه HSA Group كانت بتخطط  تستحوذ على الشركة المصرية للأغذية “بسكو مصر لكن الصفقة متمتش

المجموعة دي هي مجموعة شركات يمينية كانت بتشتغل في بيع وتوزيع المواد الغذائية بعدين اتطورت وضمت مجالات تانية زي الاستيراد والتصدير والتوكيلات بجانب دخولها مجال الصناعة والزراعة.

بس ياترى ليه بسكو مصر اتباعت؟

بيع شركة بسكو مصر يجي ضمن برنامج الطروحات الحكومية اللي بتقدمها الدولة عشان يدوا فرصة اكتر للقطاع الخاص

ومن ساعات أعلنت الحكومة المصرية طرح حصص في 11 شركة مملوكة لها ضمن برنامج الطروحات الحكومية خلال العام المالي الجاري 2025- 2026 بقيمة 3 و 4 مليار دولار، وفقاً لتقرير وزارة المالية الشهري الصادر عن شهر مايو

من ضمن الشركات دي  شركة الوطنية لتشغيل محطات الوقود، وصافي للمياه المعبأة، وسيلو فودز للصناعات الغذائية وتشيل أوت لتوزيع الوقود والشركة الوطنية للطرق.

يلا بينا نشوف تأثير الصفقة دي هيكون عامل إزاي على سوق الأغذية الفترة الجاية، ومين تاني ممكن يفكر يدخل السوق؟