بصناعة محلية 100%.. سيماف أول مصنع في مصر لصناعة عربيات المترو والقطارات

واضح كده أن مصر خلاص اتنقلت لحتة تانية خالص وكل يوم بقت تبهرنا بإنجاز جديد احسن من اللي قبله، منهم مصنع سيماف اللي بيصنع عربيات القطارات والمترو واللي بسببه وصل للعالمية وخد شهادة iris للجودة.

وده اللي أكده اللواء أحمد شاكر، رئيس مصنع سيماف، لما قال إن مصر بدأت تدخل بقوة في عصر توطين صناعة عربات المترو والسكك الحديدية، يعني بدل ما كنا بنستورد القطارات وعربات المترو من بره، بقينا بنصنعها هنا في مصر بإيدين مصريين.

شاكر أوضح إن الهدف إننا نوصل لصناعة القطار بنسبة 100% في مصر، بس في الوقت الحالي، في شوية مكونات لسه بتيجي من الشركة الأم، اللي هي هيونداي الكورية، لكن التجميع كله بيتم جوه مصنع سيماف في مصر

وعلى فكرة الموضوع مش بسيط، لأن مفيش مصنع واحد يقدر يصنع كل حاجة، عشان كده في مصانع تانية شغالة مع سيماف بتورد مكونات وأجزاء، والمصنع بيجمع كل ده في النهاية ويطلع المنتج النهائي.

شاكر قال إن فيه عقد شراكة بين سيماف وهيونداي، لتصنيع 80 عربة مترو، يعني 10 قطارات مصر خلصت منهم تصنيع 5 قطارات بالكامل.

شاكر قال كمان إن تصنيع القطارات دي مش بس بيوفر عملة صعبة كبيرة، لكن كمان بيساعد في نقل التكنولوجيا وتوطين الصناعة جوه البلد.

واللي لازم نعرفه كمان، إن تصنيع أي قطار بيبدأ من شهور قبل ما نشوفه على الأرض، يعني الإنتاج بياخد وقت طويل، بس بيبني خبرة محلية قوية.

وعشان هما شاطرين فالمصنع قدر ياخد شهادة IRIS الدولية ودي مش أي شهادة، دي شهادة نظم إدارة الجودة في صناعات السكك الحديدية، يعني المصنع بقى معتمد دوليا في التصميم، التطوير، التصنيع، وكمان خدمة ما بعد البيع

وكمان عشان هما مطابقين للمواصفات الدولية في مجالات التصميم والتطوير والتصنيع، وده يبأهلهم بقوة للمنافسة والتصدير للخارج وتعزيز الشراكات مع كبرى الشركات العالمية، وتعظيم شعار (صنع في مصر) محليا ودوليا.

وبالمناسبة دي اللواء أركان حرب مهندس مختار عبد اللطيف، رئيس الهيئة العربية للتصنيع، قال "اللي حصل النهاردة هو فخر جديد للصناعة المصرية، وخطوة قوية في طريق العالمية"