حرب أسعار بالسيارات الكهربائية.. بي واي دي ولعتها بتخفيضات على 22 موديل
في قلب الصين، معركة سيارات كهربا ولعت الدنيا و"بي واي دي" فجرت قنبلة أسعار قلبت السوق
تخفيضات مجنونة وصلت لـ34% على موديلات مش أي كلام، بتديك عربية فخمة بأقل سعر في السوق
الجمهور اتجنن، والناس زحمت معارض "بي واي دي" بشكل خرافي، وكأنها حرب شراء بدأت ومحدش عارف هتنتهي إزاي
بس في المقابل .. الأسهم بتنهار في البورصة، وأسهم "بي واي دي" فقدت أكتر من 8% في يوم واحد بس
من ناحية تانية "شاومي" داخلة بقوة في السوق، بعربية جديدة بتتحدى "تسلا" في أهم عربية عندها
المنافسة مولعة في الصين.. الكل بيجري يكسب الحصة الأكبر من السوق
المواجهة دي هتغير شكل صناعة العربيات الكهربا للأبد .. فايه اللي بيحصل ومين هيطلع الكسبان؟
في قلب الصين، ساحة المعركة مولعة بين عمالقة السيارات الكهربائية، و"بي واي دي" فجرت قنبلة أسعار ما حصلتش قبل كده.. الكل مرعوب من اللي بيحصل حرب أسعار نار، مع تخفيضات خرافية على 22 موديل كاملين، والنتيجة كانت إقبال رهيب في المعارض ناس داخلة تشتري وكأنها مهرجان
"بي واي دي" بتلعب لعبة خطيرة. خفضت سعر "سيجال" بنسبة 20% وبقت بـ7,700 دولار بس أرخص من أي عربية كهربا تانية في السوق كله.. وكمان خفضت سعر "سيل" الهجين 34%، نزلته لـ14,300 دولار! التخفيضات دي خلت الناس تتهور وتدور على أقرب معرض، وفعلا زاد عدد الزوار بنسبة 40% مقارنة بالأسبوع اللي فات
بس في نفس الوقت، الأسهم راحت في داهية! سهم "بي واي دي" نزل أكتر من 8% في بورصة هونغ كونغ، والمستثمرين بدؤوا يخافوا من حرب الأسعار اللي شكلها هتخلي الأرباح تروح في الهوا.. وده ما وقفش عند "بي واي دي" بس، ده كمان أسهم "جيلي" نزلت 7%، و"إكس بينج" خسر 4% من قيمته في لحظة
المحللين بيقولوا إن التخفيضات دي فعلاً هتزود المبيعات بشكل رهيب، بس في المقابل ممكن تضرب الهوامش الربحية وتجبر الكل يخفض أسعاره كمان.. السوق الصيني أصلًا أكبر سوق للعربيات الكهربا في العالم، وكل شركة بتحاول تسيطر عليه بأي طريقة.
وهنا يدخل الوافد الجديد.. شاومي
شركة التكنولوجيا اللي كلنا عارفينها فجأة نزلت بسيارة كهربائية جديدة SUV فاخرة بتتحدى "تسلا موديل واي" في عقر دارها.. "شاومي" مش بس بتنافس، دي جاية تكسر الدنيا يعني دي مثلا 760 كم في الشحنة، أطول حتى من "تسلا" اللي بتوصل 719 كم بس
السعر؟ بيتراوح من 34,000 لـ44,000 دولار، وده سعر منافس جدًا.. يعني اللي كان بيفكر في "تسلا"، ممكن يغير رأيه ويجرب "شاومي"، خصوصًا لو شاف التكنولوجيا الجديدة والراحة اللي بتقدمها.. والتوقعات بتقول إن "شاومي" تبيع 30 ألف عربية شهريًا يعني في السنة 360,000 عربية .. رقم مرعب
في السوق ده، "تسلا" هي اللاعب العالمي الكبير، بس دلوقتي بتواجه منافسة مرعبة من "بي واي دي" في الأسعار و"شاومي" في التكنولوجيا والرفاهية.. الحرب دي شكلها مش هتنتهي قريب، وكل شركة هتحاول تثبت إنها الأقوى.
والسؤال الأهم ..هل دي بداية نهاية "تسلا" في الصين؟ ولا "بي واي دي" هتكمل في تحطيم الأسعار لحد ما تسحب البساط من الكل؟ ولا "شاومي" اللي لسه داخلة هتقدر تقف قصاد الكبار وتثبت نفسها؟
الجمهور الصيني مبسوط بالأسعار اللي نزلت، بس البورصة بتنهار والمستثمرين بيحسبوها بالعقل. ومفيش أي ضمان إن الحرب دي هتكون مفيدة ليهم على المدى الطويل.. اللي أكيد، إننا قدام أخطر وأكبر حرب أسعار شافتها صناعة العربيات الكهربا في تاريخها
في النهاية "بي واي دي" بتكسب زباين كتير بأسعارها المجنونة، بس بتخسر في البورصة .. "شاومي" داخلة السوق بقوة، وعايزة تسحب البساط من تحت "تسلا" .. و"تسلا" لازم ترد، وإلا هتخرج من الملعب الصيني
