بيع قليل تكسب كتير.. قصة نجاح سيارات BYD اللي خلت الغلابة يركبوا عربية
- من صناعة البطاريات لصناعة سيارات كهربا غلبت تسلا
- عفريت صيني صنع كل حاجة بإيده وخلى التكلفة رخيصة وجودتها عالية
- أرقام مبيعات خلت الكبار يترعشوا ..
- من 427 ألف عربية لـ 4.27 مليون في 4 سنين بس
- خلت الغلابة يشتروا عربيات .. وبـ 12 ألف دولار حطوا على كل المنافسين
BYD عفريت الصين اللي عدا تسلا في أوروبا واحتل عرش العربيات الكهربا في العالم
ايه قصة BYD وازاي بدأت تسيطر على السوق العالمي وتحقق حلم السيارة الرخيصة والجودة العالية .. دي أسئلة هنجاوب لكم عليها في الفيديو دا.. يلا بينا
في عالم العربيات الكهربائية، الكل كان فاكر إن تسلا هي الملك اللي محدش يقدر يقربل لعرشه .. بس فجأة، ظهر عفريت صيني اسمه BYD قلب السوق كله.. الشركة دي، اللي بدأت بصناعة البطاريات، قررت تدخل سوق السيارات الكهربائية في وقت الكل كان متردد.. بس قرارهم ده ماكانش عادي، لأ، ده كان اختيار مصيري غير عالم السيارات للأبد
من أول لحظة، BYD خلت حلم السيارات الكهربائية حقيقة للناس كلها، مش بس للأغنيا.. وفي أقل من 10 سنين، قدرت تكسر أسطورة تسلا وتتصدر المبيعات في الصين، أوروبا، وأماكن تانية كتير.. ده خلى المنافسين يترعبوا ويحاولوا يلاحقوها، بس العفريت الصيني كان سبق بخطوات كتير.
BYD دخلت الملعب بتكنولوجيا غيرت الدنيا.. بطاريات قوية وآمنة، شحن ميجا وات، أسعار تنافسية، وسيارات لكل الفئات.. كل ده حصل لأنهم اختاروا يركزوا على الكهربا والهجينة بس، وقالوا وداعًا للبنزين. مش بس كده، دول كمان عملوا مصانع في دول جديدة، وسيطروا على أسواق كاملة، من أوروبا لحد أمريكا اللاتينية.
المحطة الأولى .. تصنيع البطاريات
الانطلاقة الحقيقية كانت في 1995، BYD بدأت كشركة بطاريات بتصنع للموبايلات واللابتوبات وفي 2003، قررت تاخد خطوة جريئة وتشتري شركة سيارات صينية صغيرة.. سموها BYD Auto، وده كان بداية حلم العربيات الكهربائية اللي قلب الموازين كلها.
المحطة التانية .. اعمل كل حاجة بنفسك
الميزة الكبيرة عند BYD إنهم بيعملوا كل حاجة بنفسهم.. بطاريات، محركات، إلكترونيات، برمجيات ..كل حاجة في إيديهم.. ده خلاهم يسيطروا على التكلفة وجودة المنتج، ويفتحوا الباب للعربيات الرخيصة اللي بتدي قيمة حقيقية
المحطة التالتة .. العالم كله بيدور على BYD
الحكاية اللي خلتهم يتفوقوا في 2020 .. طلعوا للعالم ببطارية Blade.. بطارية أمانها عالي جدًا وعمرها طويل. في 2021، بقوا يحطوها في كل عربياتهم الكهربائية.. دي كانت لحظة فاصلة خلت المنافسين يجروا وراهم من غير فايدة.
المحطة الرابعة .. مبيعات بأرقام خرافية بتكسر السوق
من 427 ألف عربية في 2020 لـ 4.27 مليون عربية في 2024! ده مش نمو عادي، ده قفزة خرافية خلتهم يكسروا فولكسفاجن في الصين ويتفوقوا على تسلا في أوروبا في 2025.
المحطة الخامسة .. عربيات الناس الغلابة
السر اللي خلى السوق يولع.. BYD عرفت توصل للناس الغلابة قبل الأغنيا.. عربيتهم Seagull مثلًا بـ12 ألف دولار بس، وبيعت 200 ألف عربية في 7 شهور بس في 2023.. القرار ده خلاهم يجذبوا عملاء من كل الطبقات.
المحطة السادسة ..غزو العالم
العفريت الصيني بدأها من بكين لأوروبا لأمريكا اللاتينية في 2024، وBYD صدرت 417 ألف عربية كهربائية وهجينة للعالم، وفتحت مصنع في تايلاند بينتج 150 ألف عربية في السنة.. مش بس كده، دي دخلت أوروبا بمنتجات رخيصة وتكنولوجيا جديدة خلت المنافسين يتلخبطوا
في النهاية، BYD ماكنتش مجرد شركة، دي كانت حلم كبير بيتحقق.. من مصنع بطاريات صغير في الصين لعفريت عالمي بيغير خريطة صناعة السيارات كلها.
