لو بعت عقار.. الحق نفسك وادفع ضريبة التصرفات العقارية!

انت عارف إن في ناس كتير مسمعتش عن حاجة اسمها ضريبة تصرفات عقارية وبعد كام سنة ممكن يتفاجئوا بغرامات ونزاعات على الضرائب من غير ما ياخدوا بالهم، وعشان كده الدولة نزلت قانون جديد يحل كل المشاكل دي

القانون ده بيقدم حوافز ضريبية محترمة جدا عشان يشجع الناس تسوي أوضاعها الضريبية، يعني مثلا لو عندك تصرفات عقارية حصلت في آخر 5 سنين، وطلبت المحاسبة عليها دلوقتي، الدولة هتتجاوز عن 100% غرامة  مقابل التأخير

بس هو يعني ايه ضريبة تصرف عقاري.اصلا؟

الضريبة دي انت بتدفعها لو بعت اي عقار عندك ونسبتها 2.5% من تمن البيع، وده حسب المادة 42 من قانون 91 لسنة 2005، وعلى فكرة البيت ولا الشقة اللي انت بيعتها دي لو كانت في قرية فمتقلقش انت معفي من الضريبة اصلا 

أما بقى لو العقارات دي في المدينة سواء كانت داخل أو خارج كردون المباني أو عقارات زادت مدة ايجارها أو حق الانتفاع فيها عن 50 سنة فدي برضو عليها ضريبة .

وخالي بالك لو انت من الناس اللي بتبيع وتشترى كتير، يعني شغلك الأساسي هو العقارات، يبقى دي ممارسة على سبيل الاعتياد، وهنا بيتم فتح ملف ضريبي ليك، والمحاسبة بتكون حسب صافي ربح النشاط

بس عموما سواء أنت بعت شقة واحدة أو شغلك كله عقارات، الدولة عاملة تسهيلات كبيرة، بس الأهم إنك تتحرك وتسوي وضعك قبل فوات الأوان وتستفيد بالتيسيرات دي 

طيب ازاي تاخد اعفاء من الغرامات على الضريبة؟

 وهنا بقى الحكومة قالتلك على حلين:

الاول لو إنت اللي رحت تطلب المحاسبة بنفسك خلال مدة 3 شهور من بداية العمل بالقانون، يعني قبل 11 مايو 2025،

وسددت الضريبة، من غير ما تكون المأمورية بدأت تحاسبك

ساعتها، الدولة هتتجاوزلك عن الغرامات كلها 

التاني لو المأمورية كانت حاسبتك قبل كده، وكان فيه نزاع أو خلاف، تقدر تطلب إنهاء المنازعة دي خلال 6 شهور من وقت بدء القانون، يعني قبل 11 أغسطس 2025، وتدفع الضريبة المطلوبة، و برضو الغرامة هتتجاوز عنها بنسبة 100%

أما بالنسبة للتصرفات اللي كانت قبل ال٥ سنين اللي قولنا عليهم هنا بقى القانون قال لا يحق المحاسبة عن أي تصرف مر أكتر من 5 سنين طالما أن فيه اثباتات ومستندات بتدل على أن  التصرف تم قبل ٥ سنين ومنها صحة التوقيع أو شهر العقار.