الحكومة عملت ايه لحل مشكلة  الغاز.. هل هنرجع تاني لتخفيف الأحمال؟

من وقت ما حصلت أحداث إيران، وردات الغاز لمصر بدأت تقل جدًا، وناس كتير ربطت ده بالموقف السياسي، بس الحقيقة إن الأزمة بدأت قبل كده بكتير

تحديدا من نص مايو، الكيان بدأ يقلل كميات الغاز اللي بيبعتها لمصر، وقال إن ده بسبب "صيانة" في حقل ليفياثان، و الكمية اللي كانت بتوصلنا نزلت من مليار قدم مكعب لـ300 مليون بس في اليوم

وفي نفس الوقت، شركة "إيني" الإيطالية أخرت ضخ الغاز من حقل ظُهر لحد آخر أغسطس، يعني مصر بقت مضغوطة جدا مش قادرة تغطي احتياجات الكهربا ولا المصانع

بس فجأة الكيان قال إنه هيزود سعر الغاز من 6.7 لـ9.4 دولار للمليون وحدة حرارية، وللاسف ده خلى مصر ترفع أسعار الغاز المحلي كمان في أول يونيو

وساعتها ناس كتير وقتها قالت ليه نشتري منهم أصلاً؟

بس الحقيقة إننا مضطرين لان إنتاجنا من الغاز نزل 30% خلال 3 سنين، واحتياجنا بيزيد خصوصًا في الصيف

بس الحكومة دلوقتي بتتحرك في اكتر من اتجاه عشان تأمن احتياجاتها من الغاز، والمستشار محمد الحمصاني المتحدث باسم مجلس الوزراء قال إن في خطة شغالة من الحكومة علشان تواجه استهلاك الغاز العالي في الصيف، وفعلا اتعاقدنا على 3 سفن غاز مسال، واحدة منهم وصلت واتربطت بالموانئ المصرية وبدأت تضخ الغاز

والسفينتين التانيين كمان وصلوا، والدولة شغالة دلوقتي على ربطهم بأسرع وقت ممكن حسب توجيهات من رئيس الوزراء، وده اللي هيخلي الإمدادات ترجع لطبيعتها وتكفي كل القطاعات، وأهمهم طبعًا قطاع الكهربا

وقال إن اللي حصل من تقليل الغاز لمصانع الأسمدة ده كان مؤقت، بس أول ما السفينتين يشتغلوا مع الأولى، الإمدادات هترجع زي ما كانت.

وفي وسط كل ده، الحكومة بتأكد إن مفيش أي تخفيف أحمال على الناس، والسيناريو ده بعيد، وبنشتغل علشان نت

كمان المهندس أسامة كمال، وزير البترول الأسبق، قال إن اللي بيحصل دلوقتي من توترات عسكرية في المنطقة أثر بشكل مباشر على كميات الغاز اللي كانت بتيجي لمصر

لكن الحكومة مكانتش سايبة نفسها دي بدأت من بدري تشتغل على خطوات استباقية علشان تضمن إننا نعدي الصيف من غير مشاكل، خصوصًا مع ارتفاع استهلاك الكهربا

ومن ضمن الخطة، في مراكب محملة بمازوت وسولار جاهزة للربط، عشان تشتغل كمصدر بديل لمحطات الكهربا، لأن أغلب المحطات دي بتشتغل بنظام وقود مزدوج

كمال قال إن الخطط اللي موجودة دلوقتي تقدر تستحمل انقطاع الغاز الكامل لمدة من 10 لـ 14 يوم بالكثير، ووضح إن لازم يحصل تحرك سريع علشان نلاقي حل للي بيحصل عسكريًا، لإن اللي بيحصل مش بس بيهدد أمان المنطقة، ده كمان بيأثر على استقرار الاقتصاد العالمي كله