السعوديين زباينهم.. وبتنتج 70% من العسل.. حصة شبشير قلعة صناعة النحل في مصر!
لو بتسأل على أكتر مكان في مصر بيطلع منه عسل نحل بجودة عالية هقولك بكل ثقة: "حصة شبشير"، قرية صغيرة تابعة لمركز طنطا في محافظة الغربية
القرية دي، ومعاها قرية شبشير المجاورة، بقى عندهم تاريخ طويل في تربية النحل، وناسها ورثوا المهنة دي عن أهاليهم وأجدادهم من أيام الأربعينات، يعني من أكتر من 80 سنة
ودلوقتي فيه أكتر من 3 آلاف نحال شغالين في القريتين دول، وشغلهم مش بس في إنتاج العسل لا، دول كمان بيصدروا نحل حي للخارج، خصوصا السعودية بيصدروا حاجة اسمها "النحل المرزوم"، وده نحل بيتوزن بالكيلو.
الاهم من ده كله ان القريتين دول بينتجوا لوحدهم أكتر من 70٪ من عسل النحل المصري، رغم أن العديد الكلي للسكان مش كبير، حوالي 18 ألف بس، يعني كل بيت تقريبا ليه علاقة بالنحل.
ومع العسل اللي القرية بتصدره مصر بتصدر حوالي مليون و300 ألف طرد نحل كل سنة، وده بيدخل للدولة ما يقرب من 350 مليون دولار!
وعلى فكرة النحل ليه دور مهم جدًا في الزراعة، لأنه بيساعد في تلقيح المحاصيل وده بيزوّد الإنتاج بنسبة ممكن توصل لـ30%، خصوصا في الفراولة اللي بنصدرها بره يعني قيمته مش بس في العسل لا ده ليه فوايد تانية كتير
لكن رغم النجاح ده، النحالين بيعانوا من مشاكل مش قليلة، أولها إن الشركات اللي بتشتري العسل مش بتقدر الجودة، مع إن العسل بيتقسم لـ3 درجات بس الكل بياخد نفس السعر تقريبا، وده ظلم للناس اللي شغالة بضمير.
تاني حاجة، تكلفة تربية النحل بقت عالية جدا و العائد المادي قل، خصوصا مع غلاء الخامات وسعر السكر، وفيه كمان شكوى من بعض المصدرين اللي بياخدوا طرود النحل بسعر قليل جدا ومش بيدوا الفلاحين حقهم الحقيقي.
علشان كده، النحالين بيطالبوا الحكومة تدعمهم بخطوتين أساسيتين
اولها إنشاء مراكز تدريب مرخصة تساعدهم يستفيدوا من كل حاجة بيطلعها النحل، زي "غذاء الملكات" و"سم النحل" اللي ليهم فوايد علاجية كبيرة.
و فتح أسواق جديدة في أوروبا، خصوصا وقت البرد اللي النحل هناك بيضعف فيه، وساعتها ممكن نغطي الطلب
حصة شبشير مش بس قرية دي قلعة إنتاج عسل ونحل على مستوى مصر كلها، ومصدر دخل كبير جدًا، ويستاهلوا مننا تسليط الضوء والدعم.