مفاجآت سوق الدهب في 2025.. ونصيحة من شعبة الذهب للمواطنين

أخبار الدهب اليومين دول عاملة زي الموج ناس بتقول هيغرق، وناس تانية شايفة لسه قدامه طلعة كبيرة.

بس ياترى ايه اللي هيحصل الفترة الجاية؟

حسب تقرير من «سيتي جروب»، واحدة من أكبر المؤسسات المالية في العالم،  إنهم متوقعين إن سعر الدهب يوصل لأقل من ٣٠٠٠ دولار للأوقية قبل نهاية سنة 2025 أو بداية 2026، وده لإن الطلب الاستثماري على الدهب قل، والعالم بدأ يتعافى اقتصاديا

ودلوقتي الناس بدأت تحط فلوسها في استثمارات تانية، بدل ما يخزنوا دهب، مش بس ه التقرير كمان قال إن ممكن نوصل لمستويات ما بين ٢٥٠٠ و٢٧٠٠ دولار في النص التاني من 2026

بس مجلس الذهب العالمي شايف ان الكلام ده مش دقيق لأن البنوك المركزية  اللي هي أكبر مشترين للدهب في العالم لسه شغالة شراء ومش مبطلة، وفي آخر ٣ سنين، البنوك دي اشترت أكتر من ١٠٠٠ طن دهب كل سنة، وده رقم ضخم جدًا.

ووفقا لاستطلاع جديد عملوه بين شهر فبراير ومايو، قالوا إن البنوك لسه ناوية تزود احتياطياتها من الدهب خلال السنة الجاية

كمان بنك «جي بي مورجان»  دعم الكلام ده، وقال في مذكرة بحثية إنه متوقع ٩٠٠ طن مشتريات دهب من البنوك في 2025، ولسه الاتجاه مستمر في 2026.

يعني باختصار فيه فريق بيقول "الدهب هينزل"، وفريق تاني بيقول "الدهب لسه مطلوب جدًا"

نروح بقى لمصر  وصفي أمين، رئيس الشعبة العامة للمجوهرات السابق، قال إن سعر الذهب تراجع وده انخفاض ملحوظ حصل بسبب تراجع السعر العالمي.

وسبب التراجع ده هو حالة التهدئة بين إيران والاحتلال الإسرائيلي، اللي خففت التوتر في الأسواق، وخدت شوية ضغط من على الدهب

بس الغريب إن في حركة بيع كبيرة في السوق المحلي، الناس بتبيع دهبها عشان خايفة من إن الأسعار تنزل أكتر

بس ياترى الاسعار فعلا هتنزل؟

وصفي أمين شايف إن الدهب مش هيكمل نزول كتير، وده لأن تكلفة استخراجه بقت عالية، وفيه عوامل تمنع نزوله أكتر من كده

وكمان قال لو حصلت أي توترات أو أزمات جديدة في العالم، الأسعار هترجع تعلى تاني

يعني من الآخر لو معاك دهب اصبر شوية ومتبيعهوش عشان ممكن يزيد تاني، أما لو هتشتري فده احسن وقت تشتري فيه 

ودلوقتي قولنا رايك في أسعار الدهب.. شاركنا بتعليقك