بيكسبوا بالعملة الصعبة.. قرية قاي في بني سويف مملكة التوم في مصر

انهاردة هحكيلك عن قرية مصرية بسيطة قدرت أنها تغير شكل الزراعة في مصر، قرية قاى، في محافظة بني سويف، اللي بقت  عاصمة تصدير الثوم الأحمر المصري لكل أنحاء العالم.

من قلب الريف وسط الحقول  وفي عز الشمس.فيه آلاف الفدادين مزروعة ثوم، بس  مش أي ثوم ده ثوم فاخر

بيتغلف ويتشحن لحد أمريكا وأوروبا وتايوان وأستراليا

 المهندس أحمد يحيى، واحد من ولاد القرية، بيحكي إنه بدأ التصدير من 10 سنين والنهاردة منتجاته وصلت لأسواق عالمية كبيرة، والفضل كله للناس اللي بتشتغل من قلبها

الموضوع مش بس زراعة ده اكبر من كده بكتير، ده فيه محطة كاملة لتعبئة الثوم في القرية، بيشتغل فيها حوالي 400 عامل موسمي من أهل قاى والقرى اللي حواليها

من أول التقشير، للتنضيف، للفرز والتحجيم بماكينات حديثة جاية مخصوص من الصين ماكينة بتفرز لحد 8 طن ثوم في الساعة

وبعدها بيتحط الثوم في "بالات" ويتخزن في تلاجات لحد ما يجهز للشحن وخلال 3 أيام ويوصل أوروبا، وشهر بالكتير ويوصل أمريكا وتايوان.

احمد قال إن كل سوق ليه ذوقه فيه اللي بيحب الثوم الصغير للمصانع  وفيه اللي عايز الكبير  للسوبر ماركت.

واللي مش هتتخيله إنه القرية نفسها بتشارك في معارض زراعية دولية في إسبانيا وألمانيا، عشان تعرف الناس كلها إن مصر فيها منتج عالمي طالع من قلب الأرض 

واحد من أهالي القرية وصاحب اكبر مركز لتجهيز التوم فيها قال بقالنا أكثر من 45 سنة مانعرفش حاجة غير زراعة الثوم لأننا وارثناه أبا عن جد، ودلوقتي بقى فيه أكثر من 15 ألف شاب وبنت  بيشتغلوا في الثوم بمراحله المختلفة وده فتحة خير علينا كلنا

ميزة التوم ده عن اي توم تاني أنه جودته مش موجودة في اي مكان تاني، ويمكن ده بسبب طبيعة الأرض الموجودة في القرية  عشان كده الأهالي فكروا في تصديره لدول عربية وأجنبية، وبقت قاي في  اخر 15 سنة  من أشهر قرى مصر تصديرًا للثوم

خصوصا لدول أوروبا ، و دول عربية كمان زي الأردن وسوريا والسعودية والإمارات، وليبيا، كمان بيصدروا لدول شرق آسيا، وبعض الدول التانية حسب الطلب، يعني تقريبا مسبوش دولة الا وصدروا ليها

ودلوقتي قولنا جربت تشتري توم من قرية قاي.. شاركنا بتعليقك