6 ساعات في ظلمات البحر .. إيه اللي حصل لـ30 عامل ومهندس في حفار جبل الزيت؟
محدش كان متوقع اللي حصل.. يوم شغل عادي الساعة قربت 6 ونص المغرب، الشمس كانت بتودع السماء، والدنيا بدأت تغيم فوق مية البحر الأحمر عند جبل الزيت، شمال محافظة البحر الأحمر، جنب خليج السويس.
حفار جبل الزيت
في اللحظة دي، كان فيه حفار جبل الزيت اسمه "إد مارين 12"، تابع لرجل الأعمال المعروف ممدوح عباس، واللي شركة "عجيبة" مأجرينه، بيتسحب بقاطرات بحرية علشان يتنقل من مكان شغله القديم لمنصة تانية اسمها الأشرفي.
العملية دي كانت روتينية، بتحصل كتير.. 3 وحدات بحرية بتسحب الحفار، والناس اللي عليه حوالي 30 فرد، بين مهندسين وفنيين وعمال.. لكن اللي حصل بعد كده، ماحدش كان يتخيله…
الحفار اتقلب وغرق وفي ثواني، من غير إنذار، من غير عطل معروف، ومن غير أي بلاغ مسبق.
فيه ناس بتقول الجو كان بدأ يقلب، فيه موج عالي، وفيه ناس بتقول ممكن يكون فيه خلل في توازن الحفار نفسه.
بس في الآخر، اللي حصل حصل، وبدأت 6 ساعات في قلب البحر… ظلمة وموج وصراخ واستغاثات.
رجالة وقعت في المية، ناس اتشبثت في قطع حديد عايمة، وفيه ناس غابت تماما
طب إيه اللي حصل بالظبط لـ حفار جبل الزيت؟
لحد دلوقتي مفيش تفسير رسمي واضح، لكن التحقيقات الأولية بتقول مفيش أعطال معروفة في الحفار نفسه، ولا في وحدات القطر، فالموضوع على الأغلب كان بسبب خلل مفاجئ في الاتزان أو تغير حاد في حالة البحر المهم، الحفار نزل لتحت.. وفوقه 30 بني ادم.
الاستجابة جات بسرعة.. وحدة إنقاذ تابعة لشركة "جابكو" استقبلت استغاثة عاجلة.. طيارات مروحية اتحركت فورًا من رأس شقير، وقاطرات بحرية دخلت على الخط وغواصين متخصصين من شركات البترول نزلوا للبحث وتم إنقاذ ما بين 24 واحد و4 أفراد تأكدت وفاتهم، ولسه فيه 2 مفقودين بتتعمل عمليات بحث عنهم.
اللي حصل ده خلى الكل يتحرك على الأرض.. وزير البترول كريم بدوي، ووزير العمل محمد جبران، ومحافظ البحر الأحمر عمرو حنفي، نزلوا بنفسهم مستشفى الجونة، وراحوا يطمنوا على الناس اللي نجت من الحادث.
دخلوا على المصابين، سألوا الأطباء، واطمأنوا إن الرعاية الصحية متوفرة، والدولة متكفلة بكل حاجة.
قدّموا العزاء في الضحايا، وأكدوا إنهم مش هيسيبوا المصابين غير لما يتأكدوا إن كل واحد فيهم رجع بيته بالسلامة.
وزارة البترول كمان كانت عاملة شغل كبير، فعلت خطة الطوارئ من أول لحظة، وسخرت كل الإمكانيات البحرية والجوية من سفن إنقاذ وطيارات مروحية وقاطرات دعم وفرق غطس
وتم التنسيق مع كل الجهات في الدولة لإنقاذ الطاقم بأسرع ما يمكن وكمان الوزيرين نزلوا بنفسهم موقع الحادث عشان يشوفوا الموقف بعنيهم، وكان معاهم كبار المسؤولين من قطاع البترول
الأكيد أن الحادث صعب وأليم التحقيقات شغاة دلوقتي، وبيتم فحص كل حاجة .. هل كان فيه خلل في توازن الحفار؟ هل وحدات القطر مشيت صح؟ هل فيه مشكلة في خطة النقل نفسها؟ هل الجو فعلاً قلب فجأة؟ وإزاي معدة بالحجم ده تغرق فجأة من غير أي إنذار؟
