واحد بيكسب فلورز والتاني مليارات.. القبطان وامبراطور العقارات.. لما شغلك يتكلم عنك!

تعالى أحكيلك النهاردة عن نموذجين مختلفين تمامًا من رجال الأعمال واحد منهم  بتاع شغل والتاني بتاع سوشيال

الأول مش هتشوفه كتير، لا بيطلع في تيك توك، ولا بيصور نفسه وسط عربيات، بس كل يوم بيبني وبيبيع وبيكسب مليارات من غير دوشة

والتاني هتشوفه في كل حتة حفلات. فيديوهات، في صور مع فنانين بس لما تيجي تدور وراه، لازم تسال هو فين شغله 

تابع معايا الفيديو ده وانا هقولك بالظبط مين اللي هنتكلم عنهم انهاردة..

في وقت ما كتير من رجال الأعمال الحقيقيين في مصر بيختاروا إنهم يشتغلوا في صمت، لا بيظهروا في الإعلام ولا بيحبوا السوشيال ميديا بنلاقي موجة تانية تماما من رجال الأعمال الجداد، اللي حياتهم كلها على إنستجرام ويوتيوب والتيك توك

شغلهم على أرض الواقع مش بنفس الحجم، ولا حتى في بعض الأحيان له وجود حقيقي

وأكتر اسم بيتكرر في الدايرة دي هو "مصطفى فايد"، أو زي ما الناس بتسميه القبطان شاب من محافظة الغربية، عنده 32 سنة، اتخرج من هندسة كهربا باور سنة 2016، لكن بيقول إنه بدأ شغل العربيات من 2008، وهو لسه عيل تقريبا عنده 15 سنة.

 بس السؤال هنا إزاي؟

يعني إزاي طالب في إعدادي أو أولى ثانوي يبدأ تجارة عربيات مين ساعده ومين موله اصلا  طيب ولو كانت بدايات بسيطة إزاي فجأة قدر يسافر كوريا الجنوبية، ويفتح شركة هناك، ويستورد عربيات للسوق المصري قبل الوكلاء الرسميين ب6 شهور

ده مش إنجاز عادي لان فيه فرق كبير بين إنك تكون شاطر وموهوب، وإنك تسبق شركات كاملة عندها وكلاء حصريين، وسلاسل إمداد، وميزانيات بملايين

بس أكبر علامة استفهام حوالين مصطفى فايد، هي إنه بيظهر على السوشيال ميديا كواجهة لرجل أعمال ناجح جدًا،

من غير ما يوضح ازاي بدء وايه هي الخطوات اللي مشي عليها عشان يوصل لكل ده 

والغريب أن كل اللي هتلاقيه في الفيديوهات اللي بينشرها عربيات فخمة، حفلات لقاءات مع فنانين وصحفيين كبار طيب منين كل ده يا قبطان؟

في الجهة التانية بقى هتلاقي هشام طلعت مصطفي ملك العقارات في مصر واكبر مطور عقاري الراجل اللي كل سنة بيحقق مليارات واللي فعلا شغله بيتكلم عنه لا بقى بيهمه سوشيال ميديا ولا فيديوهات تيك توك اصل زي ما تقول كده وخدها جد من صغره

كفاية أن اقولك أن هشام دلوقتي ناوي يطلق مشروع كبير اسمه "السباين" في "مدينتي" المشروع ده هيكون على مساحة 2.4 مليون متر مربع، وهيضم مركز تجاري حديث، وابراج فيها شقق ومحلات راقية، ومساحات للترفيه والشغل، وكمان خدمات فندقية.

هشام   المشروع ده هيزود مبيعات المجموعة ويحافظ على نجاحها بعد ما حقق في سنة 2024  مبيعات ضخمة وصلت لأكتر من نص تريليون جنيه، وده رقم قياسي في السوق العقاري في مصر والمنطقة كلها.

ده كمان شغال على مشروع تاني كبير في الساحل الشمالي اسمه "ساوث ميد"، على مساحة 23 مليون متر، حقق من وراه مبيعات بـ280 مليار جنيه في 5 شهور بس

 وفي نفس الوقت بيكمل شغل في مشروع "بنان" في السعودية، اللي حقق 64 مليار جنيه مبيعات السنة اللي فاتت، انت متخيل كل الانجازات دي حققها ولسه بيحققها من غير بقى شو لا حفلات ولا اي حاجة من اللي بنشوفها ونسمع عنها من ناس معملوش ربع النجاح دي 

الفرق بين هشام طلعت  ومصطفى فايد مش بس فرق في الأرقام، والمشروعات  الفرق الحقيقي إن واحد فيهم بيبني على الأرض والتاني بيبني على المتابعة والمشاهدات، واحد شغله بيتكلم عنه من غير ما يقول، والتاني بيتكلم كتير من غير ما نعرف شغله فين

واحد اسمه محفور في مشاريع بمليارات والتاني اسمه مكتوب في فيديو عليه مؤثرات صوت ولقطة مع فنان.