حسن عبدالله يمثل مصر في G20.. من أجل اقتصاد عالمي أكثر عدالة

في وقت العالم كله بيواجه تحديات اقتصادية وسياسية خطيرة، مصر كانت موجودة وبقوة في واحدة من أهم الاجتماعات الدولية في 2025، واللي جمعت وزراء المالية ومحافظين البنوك المركزية لدول مجموعة العشرين G20 في جنوب أفريقيا

ايه اللي حصل في الاجتماع ده محافظ البنك المركزي قال ايه فيه:

من ساعات  محافظ البنك المركزي المصري، حسن عبدالله حضر فعاليات الاجتماع التالت لسنة 2025 لوزراء المالية مع محافظين  البنوك المركزية لمجموعة العشرين "G20"

المشاركة دي شملت حضور المحافظ لعدد من الجلسات اللي ناقشت مواضيع مهمة ومختلفة، زي أوضاع الاقتصاد العالمي، والهيكل المالي العالمي، وكمان مناقشات عن أكبر المعوقات اللي بتواجه التنمية في أفريقيا، والتمويل المستدام، وملفات القطاع المالي والشمول المالي.

 المحافظ قال إن فيه ضغوط مستمرة على الاقتصاد العالمي بسبب التوترات الجيوسياسية والحروب التجارية اللي بتزيد يوم عن يوم، عشان كده محتاجين ننسيق بين السياسات النقدية والمالية علشان نقدر نحافظ على الاستقرار الاقتصادي بشكل عام

المحافظ كمان دعى لتقوية كفاءة وفعالية المؤسسات المالية الدولية، ونشجعها تتبنى أدوات مالية جديدة ومبتكرة تشجع استثمارات القطاع الخاص، وتساعد في تقليل المخاطر، زي استخدام حقوق السحب الخاصة بشكل أفضل.

وشدد على عمل إصلاحات حقيقية في الهيكل المالي العالمي، وقال أن لازم  يكون فيه تمثيل أقوى للدول الأفريقية، و إن وجود نظام واضح وشفاف للرصد والمتابعة خطوة مهمة علشان نحقق الأهداف دي ونضمن استمراريتها.

وكمان نبه على خطورة النمو السريع للمؤسسات المالية غير المصرفية، واللي مش بيكون ليها رقابة وتنظيم كافي، وقال إن لازم يكون فيه تنسيق دولي أقوى علشان نضمن استقرار النظام المالي في العالم كله.

ووضح أهمية وجود حوار مفتوح بين الدول الدائنة والمديونة، وكمان وكالات التصنيف الائتماني والمنظمات الدولية، علشان نقدر نحط استراتيجيات واضحة لإدارة الديون، وطلب إن مبادرة "الإطار المشترك" لازم تتوسع وتشمل كمان الدول متوسطة الدخل، لأنهم كمان بيعانوا من ظروف صعبة، وقال كمان إننا محتاجين أدوات جديدة علشان نخفف عبء الديون ونحقق استدامة مالية حقيقية.

مش بس كده ده دعا كمان لضرورة توفير تمويل ميسر ومختلط أكتر للدول النامية، وقال إن من المهم يكون فيه خطط وطنية واضحة تقودها كل دولة، علشان الاستثمارات تروح في الاتجاه اللي يخدم التنمية، وقال أن لازم نوحد د المعايير البيئية، وإننا نطور أدوات فعالة لتوزيع وتقاسم المخاطر، خصوصا أن  فيه تحديات كتير بتواجه الدول النامية زي التضخم، وقلة أدوات التمويل الأخضر، وقلة المشروعات الاستثمارية المستدامة.

 المحافظ كمان أكد على ضرورة تطوير الأسواق المالية المحلية ونستخدم التكنولوجيا الحديثة، وبالأخص تقنيات الذكاء الاصطناعي، علشان نحسن الإنتاج ونرفع جودة الخدمات.

وقال  إن لازم نقوي الشراكة بين الحكومة والقطاع الخاص علشان ننفذ مشروعات البنية التحتية، خصوصًا المشاريع اللي بتربط بين دول مختلفة، لأنها بتساعد في تقوية التعاون الإقليمي.

ومن ناحية تانية، حسن عبدالله عبر عن دعم مصر للبرنامج اللي بيقترح تعاون أكبر بين مجموعة العشرين والقارة الأفريقية في مجالات البنية التحتية، والمناخ، والابتكار التكنولوجي من سنة 2026 لحد 2030.

وفي الاخر  أكد إن الشمول المالي عنصر أساسي لأي نمو اقتصادي عادل وشامل، ودعا لتوسيع نطاق الخدمات غير المالية اللي بتتقدم للمشروعات الصغيرة والمتوسطة، وتسهيل إجراءات التعرف على العملاء، وتطوير قواعد بيانات دقيقة، وكمان نبتكر نماذج جديدة لتقييم الائتمان