ساب الطب علشان القشطوطة.. مؤمن عادل من الطب للرز بلبن

ورا كل قطعة حلويات في "بلبن" فيه قصة كبيرة… قصة شاب مصري بدأ من الصفر ، كان طبيب بيطري بس سب كل ده وقرر يتحدى نفسه ويبني إمبراطورية العالم كله بيتكلم عنها

مؤمن عادل إمبراطور الرز بلبن في مصر.. يلا بينا عشان نعرف حكايته من اول الطب لسلسة بلبن

امبراطور بلبن 

إمبراطورية بلبن اللي مكسرة الدنيا وراها شاب مصري اسمه الدكتور مؤمن عادل… الراجل ده بدأ من الصفر، كان طبيب بيطري، درس الحيوانات والطب، وكان ممكن يكمل حياته في المجال ده، لكن قلبه كان بيقول له حاجة تانية… حلم إنه يعمل مشروع لنفسه ويخلق حاجة الناس تحبها.

عشان كده بدأ بمحل صغير للحلويات في الإسكندرية، محل بسيط جدًا، لكن ده كان البداية وساعتها كان كله خوف وقلق في البداية، لأنه مش عايز يغلط أو يزود المصاريف وهو لسه في أول المشوار.   مؤمن بيقول  إنه كان قاعد في شقة مفيش عامل يقبل يقعد فيها ساعة، عشان يقللوا التكلفة، كان كل لحظة في اليوم فيها ضغط كبير، تعب جسدي ونفسي على طول.

بس بالرغم من كل ده، مؤمن ما استسلمش. بدأ مشروعه يلمس الناس، ويلفتوالنظر ايه الشباب والعائلات حبو الحاجات الحلوة اللي بيقدمها، والسمعة انتشرت بسرعة. وبعد كده، توسع وفتح فروع كتير في القاهرة والمحافظات، لدرجة إنه صيته سمع لدول كتير ، عشان كده اتوسع  في السعودية والإمارات 

لكن الدنيا مش دايمًا سهلة مؤمن واجه صعوبات كتير من اول المحلات اللي اتقفلت في السعودية ومصر لحد اسماء منتجاته اللي كانت دائما محل جدل 

بس مؤمن رغم كل الضغوط دي هو ما فقدش الأمل ورجع وقف على رجله من تاني زمحلاته لسه مكسرة الدنيا اكتر من الاول

والنهاردة مؤمن عادل بقى واحد من أبرز رواد الأعمال الشباب في مصر. مشروعه مش بس ناجح، ده بقى علامة تجارية معروفة جدًا، الناس بتحبه وبتثق فيه، وبيقدم الحلويات بطريقة عصرية بتخاطب ذوق المستهلك الحديث.

 مشروع بدأ من محل صغير، لكنه اتحول لإمبراطورية كبيرة… وكل ده بسبب حلم، إرادة، تعب، وشوية جرأة إنه يسيب الطب ويمشي ورا شغفه.

 مافيش حلم كبير من غير تعب وضغط  قبل النجاح…المهم تفضل تحاول وماتفقدش الأمل أبداً.