دفاية سرير ومتذوق آيس كريم.. أغرب وظيفة هتسمع عنها في حياتك

عمرك فكرت قبل كده تشتغل دفاية سرير ولا متذوق ايس كريم ، طب ايه رايك تبقي شغال احتياطي 

كل دي وظائف موجودة فعلا والاغرب أن مرتباتها خيالية بتوصل لملايين

بس الوظائف دي موجودة فين وايه تفاصيلها كل دي تفاصيل هتعرفها معانا في الفيديو ده 

اغرب وظايف في العالم 

بعد التخرج.. كلنا تقريبا بنعدي بنفس المرحلة الغريبة دي، مرحلة إنك بتدور على وظيفة تحس إنها شبهك، تناسب دراستك ومجهودك اللي صرفته سنين في الجامعة، وبتبقى فاكر إن الشهادة كفاية علشان تفتحلك باب الشغل اللي بتحلم بيه.. بس أول ما تنزل السوق الحقيقي، تكتشف إن الدنيا مش ماشية كده خالص

تلاقي نفسك بتلف ورا الشركات، وتبعت في كل حتة، واللي بيرد يقولك “لازم خبرة”.. طب إزاي أجيب خبرة وأنا لسه متخرج؟ وهنا تبدأ الرحلة الطويلة اللي كلنا تقريبًا بنمشي فيها: شوية تدريب، شوية تطوع، شغل بمرتب قليل، لحد ما توصل لمرتب تقول عليه “ماشي.. الحمد لله”

بس الغريب بقى، إن وانت بتعافر في السكة دي، تكتشف إن في ناس حول العالم بتقبض أرقام خرافية من شغلانات غريبة جدًا.. شغلانات ممكن أول ما تسمع عنها تضحك، بس لما تعرف المرتب تقول “طب وليه لأ؟!”

يعني مثلًا، في وظيفة اسمها مراقب لاعبي البينجو.آه زي اللعبة اللي كنا بنلعبها وإحنا صغيرين.. بيراقب الناس اللي بتلعب في القاعات عشان يمنع الغش أو التلاعب. المهنة دي لو اشتغلت فيها ممكن تقبض من 67 ألف لـ169 ألف دولار في السنة يعني تقريبا ما بين مليون وممكن تلاتة مليون جنيه مصري 

وفي وظيفة تانية اسمها متذوق الآيس كريم.. تخيل إن شغلتك تكون إنك تدوق آيس كريم كل يوم، وتقول رأيك في الطعم والقوام وجودة المنتج! وبيقبضوا كمان كويس جدًا، ما بين 69 ألف لـ100 ألف دولار في السنة. يعني لو بتحب الحلويات.. الشغل ده معمول ليك!

نخش على الأغرب.. مدفي السرير

آه والله، في ناس بتتدفع فلوس علشان يدفوا السرير قبل ما صاحبه ينام! يعني بيناموا مكانه من 10 دقايق لساعة عشان السرير يبقى دافي ومريح، وساعتها الأجر ممكن يوصل لـ 100 دولار في الساعة! تخيل؟ في ناس بتقبض آلاف الدولارات علشان “تنام” بس طبعا الوظيفة بتكون في الفنادق بس 

في كمان وظيفة غريبة جدًا اسمها الشخص الاحتياطي.. دي بقى إنك تكون شبه شخص معين، وتقوم مكانه في مقابلات أو مناسبات أو اجتماعات، كأنك نسخة تانية منه والجميل إن المرتب فيها ممكن يوصل لـ 220 ألف دولار في السنة يعني حوالي سبعة مليون جنيه كل المطلوب إنك تعرف تتصرف زيه وتبقى مركز.

أما آخر وظيفة، فهي غواص كرات الجولف الناس اللي بتلعب جولف ساعات الكور بتقع في المية، فدورك كغواص إنك تنزل تجيبها وتجمعها تاني. بسيطة جدًا بس مربحة جدًا، لأن متوسط الدخل يوصل لـ 100 ألف دولار في السنة، يعني أكتر من 3 مليون جنيه

كل الشغلانات دي بتثبت حاجة واحدة بس.إن مش دايمًا النجاح معناه تمشي في السكة اللي كل الناس ماشية فيها، ولا الوظيفة اللي درستها هي الوحيدة اللي تنفعك.