ارتفاع مفاجئ في أسعار الحديد.. إيه مصير العقارات؟

تبقى رايح تبني بيتك أو مشروعك، وفجأة تلاقي أسعار الحديد طلعت لفوق بشكل مفاجئ

بس ده اللي حصل في مصر الأيام اللي فاتت، بعد ما الحكومة فرضت رسوم جديدة على واردات البيليت والصلب. 

الرسوم دي هدفها حماية الصناعة المحلية، بس في نفس الوقت خلت سوق الحديد كله محتار، والأسعار طلعت بشكل مخيف، وده أثر على سوق البناء والعقارات كمان. 

خليك معايا عشان نفهم كل التفاصيل ومصير اسعار الحديد 

أسعار الحديد

 الموضوع كله بدأ لما الحكومة قررت تحمي صناعة الحديد المحلية من الإغراق اللي كان حاصل بسبب زيادة واردات البيليت والصلب المدرفل، وفرضت رسوم مؤقتة على الواردات دي لمدة 200 يوم. الرسوم دي زي ما بيقولوا هتزود تكلفة الطن حوالي 5 آلاف جنيه، وده طبعًا خلى السوق كله يتحرك بحذر.

الشركات الكبيرة زي "المراكبي للصلب" و"حديد عز" حاولوا يهدوا السوق شوية، فثبتوا الأسعار مؤقتًا عشان الناس ما تخافش وتبدا تشتري بكميات كبيرة، بس في نفس الوقت التجار الصغيرين، اللي بيخافوا من أي زيادة مفاجئة، حاولوا يرفعوا الأسعار شوية.

بس في نفس الوقت القرار ده كان لازم يتاخد بعد ما الصناعة المحلية اتضررت قبل كده  بسبب انخفاض أسعار واردات البيليت والصلب عن المنتج المحلي، وده أثر جامد على مصانعنا وأدى لخسائر. وطبعًا، لما الحكومة فرضت الرسوم، الناس كلها بدأت تبص للسوق بحذر، وفيه تجار اشتروا كميات للتحوط من زيادة الأسعار.

بس المشكلة مش بس في الأسعار، حتى الإنتاج والمبيعات اتأثروا. مصر أنتجت في النصف الأول من 2025 حوالي 3.8 مليون طن حديد تسليح، وده أقل من نفس الفترة السنة اللي فاتت، والسوق كله شوية راكد بسبب انخفاض الطلب على مواد البناء.

وبعدين الموضوع كمان وصل لسوق العقارات… لأن لما تكلفة الحديد تزيد، تكلفة البناء كلها هتزيد، وبالتالي أسعار الشقق والمنازل هتعلى. 

فيه  خبراء بيقولوا إن السعر الطبيعي للطن المفروض يكون حوالي 31 ألف جنيه، بس للأسف في السوق وصل لـ 38 ألف جنيه عند بعض الشركات الكبيرة.

يعني بالمختصر المفيد، الرسوم الحكومية كانت لحماية الصناعة المحلية من الإغراق، بس في نفس الوقت سببت قلق في السوق وزيادة في الأسعار، وتأثيرها وصل لسوق البناء والعقارات، والناس كلها دلوقتي متلخبطه ومتابعة بحذر أي خطوة جاية.

الموضوع كله محتاج متابعة حقيقية، خصوصًا إن الأسعار لما تثبت مؤقتًا، السوق يهدأ شوية، لكن لو أي شركة قررت تغير السعر أو يحصل أي تقلب في السوق العالمي، هنشوف زيادة تانية ومشاكل أكبر، واللي بيشتري الحديد للاستثمار لازم يبقى عارف إنه ممكن الأسعار تتحرك في أي وقت.