رئيس شعبة الدواجن: استمرار انخفاض الأسعار يدمّر الصناعة ويُخرج صغار المنتجين من السوق
أكد الدكتور عبد العزيز السيد، رئيس شعبة الدواجن بغرفة القاهرة التجارية، إن الهبوط المتواصل في أسعار الدواجن «مش مؤشر إيجابي»، بل بيضغط بشكل كبير على صغار المربين اللي شغالين بدورة إنتاجية واحدة ومش قادرين يتحملوا الخسائر زي الشركات الكبيرة.
وأوضح في تصريح خاص لـ" سمارت فاينانس" إن التكلفة الفعلية لإنتاج كيلو الدواجن بتوصل لـ65 جنيه، في حين إنه بيُباع في السوق بـ57 و58 جنيه، وده حسب وصفه «أي نزول تاني يبقى خروج كامل للمربي الصغير من السوق».
وأشار إلى إن الشركات الكبيرة بتقدر تكمل لأنها بتملك كل حلقات الإنتاج من الجدود لحد المجزر، بينما الصغير بيعتمد على دورة واحدة ولو خسر فيها «بيقفل ويمشي فورًا».
وقال إن مصر بتنتج حوالي 1.6 مليار دجاجة و16 مليار بيضة سنويًا، وإن الإنتاج مستقر ومفيش أمراض وبائية، لكن ضعف القوة الشرائية هو السبب الحقيقي وراء تراجع الأسعار.
وشدد على إن صناعة الدواجن ما ينفعش تتساب لمنطق العرض والطلب، لأنها مصدر البروتين الأرخص للمواطن، وطالب بعودة معادلة سعرية واضحة زي اللي كانت بتتطبق في الثمانينيات، تعتمد على تكلفة الكتكوت والعلف والدواء والنافق والعمالة، مع هامش ربح بسيط.
وأوضح إن فكرة البورصة السلعية مش هتنفع مع الدواجن الحية لأنها ما بتتخزنش، وإن ده مش هيكون قابل للتطبيق إلا بعد منع تداول الطيور الحية واعتماد الذبح والتجميد.
وطالب بوجود جهة تدير المنظومة ويكون فيها أصحاب الخبرة اللي فاهمين السوق كويس، مؤكدًا إن الحلول موجودة وسهلة لو في إرادة للتنفيذ، خاصة مع وجود احتياطي من الذرة والصويا يكفي لثلاثة أشهر يضمن تثبيت سعر العلف خلال دورة الإنتاج.
وفي النهاية، حذّر من إن استمرار الوضع زي ما هو «هيعمل اضطراب أكبر» في قطاع بيعاني أصلًا من تراجع الطلب وارتفاع التكلفة.
