قبل ما تحط جنيه فيه.. نصائح خد بالك منها وانت بتشتري دهب!
لو بتفكر تشتري دهب الفترة دي استنى شوية واسمع الكلام ده كويس اوي قبل ما تحط ولا جنيه!
لإن فيه نقطة خطيرة ناس كتير بتقع فيها من غير ما تاخد بالها، والخبير الاقتصادي محمود عطا كشفها بشكل واضح جدًا.
عطا قال إن الدهب فعلاً استثمار قوي ويحافظ على قيمته لكن ده مش معناه إنه لعبته سهلة أو من غير مخاطر. أكبر غلطة ممكن تعملها إنك تروح تشتري مشغولات ذهب على إنها استثمار طب ليه؟
لإن المصنعية عالية، ولما تيجي تبيع هتخسر جزء كبير من فلوسك من غير ما تحس.
عشان كده نصح إن اللي عايز يستثمر بجد يلجأ للسبايك الصغيرة، والجنيهات الذهب، أو صناديق الاستثمار الخاصة بالدهب اللي بتديك حرية البيع والشراء بسهولة ومن غير خسائر زيادة.
الأهم من ده كله إنه حذّر إن مفيش حد يحط كل فلوسه في الدهب لإن السعر ممكن يعمل تصحيح في أي وقت، وساعتها هتتعرض لخسارة كبيرة. الصح إن محفظتك تكون متنوعة جزء دهب وجزء استثمارات تانية.
وبرغم كل ده عطا أكد إن الدهب بيكسب على المدى المتوسط والطويل، لكن بعيد تمامًا عن لعبة المضاربة السريعة اللي نهايتها دايمًا مخاطرة.
انت بقى شايف هل ده أنسب وقت تشتري فيه دهب ولا تستنى؟