المصريين بيشربوه بـ30 مليار جنيه كل سنة.. ليه مصر مش بتزرع الشاي؟!

كوباية الشاي جزء كبير من حياة المصريين، تقريبا كده مفيش بيت في مصر إلا ولازم تلاقي فيه شاي غنى بقى ولا فقير مش فارقة الشاي لازم يكون موجود ايا كان الظروف 

ومش هبالغ لو قولتلك انك ممكن تلاقي شخص بيشرب ٦ ولا٧ كوبايات في اليوم، ده حتى البقشيش في مصر بقى اسمه الشاي تركن عربيتك يقولك الشاي يا بيه تخلص  ورق في اي مصلحة يتقالك الشاي يا باشا

طب سيبك من كل ده انت متخيل أنه من حب المصريين والأجانب كمان في الشاي عملوا ليه يوم مخصوص أيوة انهاردة اليوم العالمي للشاي

المفاجأة أن المصريين طلعوا بيشربوا باكتر من 30 مليار جنيه كل سنة شاي، وده مش كلامي ده اللي أكدته منة الله شركس مدير عام شركة ليبتون مصر ، اللي قالت أن إجمالي متوسط مبيعات الشاي في مصر بتتخطى 30 مليار جنيه سنويًا.

واتضح أن استهلاكنا السنوي من الشاي بين 65000 و75000 طن يعني كل فرد بيستهلك تقريبا ما بين  0.8 لكيلوجرام واحد في السنة

منه قالت إن الشاي من السلع الرئيسية للمستهلك المصري بس رغم كده هما  مزودوش أسعاره بنفس زيادة نسبة التكلفة لأنهم متفاهمين الضغط اللي بيواجه المستهلك وسط ارتفاع الأسعار

بس رغم حب المصريين في الشاي للاسف الشاي مش بيتزرع بنستورده من برا بمبالغ كبيرة كل سنة، طبعا زمانك بتقول دلوقتي طب ليه احنا منزرعهوش؟

هقولك يا سيدي، كل الحكاية أن مصر معندهاش التربة ولا المناخ المناسب لزراعة الشاي هو محتاج لجو معين كده عشان يتزرع بشكل سليم، بس هل ده معناه اننا مستحيل نزرعه 

هقولك لا طبعا ممكن جدا نزرع الشاي، بس بشرط أننا نوفر المناخ والتربة المناسبة عشان يطلع بالطعم اللي اتعودنا عليه وده ممكن تعمله الصوب الزراعية بس برضو الموضوع مش سهل محتاج شوية وقت 

طبعا ده لو حصل هيكون ليه تأثير اقتصادي كبير على البلد كفاية أننا هنخفض واردتنا منه وهنوفر فلوس كتير، ومش بعيد كمان احنا اللي نصدره 

خصوصا أن في سنة  2024، استوردنا شاي بقيمة  205 ملايين دولار يعني باكتر من 10 مليار جنيه من اكتر من دولة زي كينيا، و الهند  وسريلانكا والإمارات 

وخلال اخر 10 سنين مصر استوردت شاي ب3 مليار دولار أمريكي، بمتوسط قيمة واردات سنوية  ٢٩٠ مليون دولار أمريكي.