ساويرس ومنصور أغنى عيليتن في مصر.. ثروتهم وصلت لكام؟
قائمة فوربس السنة دي أعلنت عن أغنى أغنياء مصر واللي متغيروش كتير عن السنة اللي فاتت هما نفس الـ5 مليارديرات اللي كانوا في قائمة من غير أي تغييرات بس الجديد؟ إن ثرواتهم زادت!
إجمالي ثروة المليارديرات المصريين بقت 20.6 مليار دولار، بزيادة حوالي 2.2 مليار دولار عن السنة اللي فاتت، يعني لو حد قالك أن الأزمة الاقتصادية على الناس في مصر متصدقهوش
وكالعادة الصدارة كانت لناصف ساويرس، أغنى رجل في مصر وناصف دايما عاودنا أنه يبقى نمبر وان في قائمة فوربس وده لوحده ثروته زادت 800 مليون دولار، عشان توصل ثروة السنة دي ل9.6 مليار دولار
بس السؤال هنا ياترى ناصف حاب كل الفلوس دي منين؟
الحقيقة أن ناصف مشغل فلوسه في اكتر من مجال بس هو مركز اكتر على الرياضة، وسبق وناصف اشترى حصة في شركة Exor المالكة لنادي يوفنتوس الإيطالي، ناصف كمان بيستثمر في نادى أستون فيلا الإنجليزى وليه فيه نسبة 55% بقيمة 8 مليار دولار
عشان كده سنة 2023 دخل ناصف قائمة أغنى ملاك أندية كرة القدم على مستوى العالم
مش بس كده ناصف كمان بيدير شركة «OCI»، ودي واحدة من أكبر شركات إنتاج الأسمدة النيتروجينية في العالم، وليها مصانع في تكساس وأيوا، وبيتم تداول أسهمها في بورصة يورونيكست أمستردام، كمان هو مدير أوراسكوم للإنشاءات
وييجي بعده على طول أخوه نجيب ساويرس، اللي معروف باستثماراته في الذهب والإعلام، بصافي ثروة 5 مليار دولار ونجيب في الاساس بنى ثروته لما استثمر في قطاع الاتصالات، بس بعد كده وجه كل استثماراته في الدهب ووصلت حجم استثمارات شركته في مناجم الذهب ل 1.5 مليار دولار.
وغير كده نجيب هو رئيس شركة أوراسكوم للاستثمار القابضة، وفوق كل ده بيستثمر في العقارات، وحاليا ساويرس بيستثمر في 3 فنادق بإجمالي استثمارات بقيمة 200 مليون دولار.
وطبعًا، زي ما احنا متعودين، القائمة فضل فيها عيلة تانية مع عيلة ساويرس، وهي عيلة منصور اللي بيتصدرها محمد منصور بصافي ثروة 3.4 مليار دولار
محمد هو مؤسس وكالات (جنرال موتورز) في مصر سنة 1975، وهو واحد من أكبر موزعين العربيات في العالم.
كمان بيستثمر في مجال الذكاء الاصطناعي، من خلال 60 شركة ناشئة في قطاع التكنولوجيا، ده غير استثماراته في كرة القدم، منصور أعلن عن إنشاءه لنادي سان دييغو ليدخل الدوري في 2025، ده غير أن عنده واحدة من أكبر 7 أكاديميات لكرة القدم في العالم.
بعده يجي يوسف منصور بصافي ثروة 1.4 مليار دولار وهو رئيس مجلس إدارة مجموعة منصور يوسف مش بس رئيس مجلس إدارتها هو كمان بيشرف على قسم المنتجات الاستهلاكية، منها سلسلة المحلات التجارية “مترو”، وليه حقوق توزيع لمنتجات “لوريال” فى مصر.
مفيش أسماء جديدة دخلت، بس واضح إن الكبار لسه مسيطرين، وبيكسبوا أكتر كمان، يعني باختصار القايمة مفيهاش اي مفاجآت من ناحية المليارديرات، بس فيها شوية أرقام بتقول إنهم لسه ماشيين في السليم
ودلوقتي قولنا تفتكر ممكن يجي اليوم اللي تدخل فيه ثانية فوربس شاركنا بتعليقك..