بتشتغل فري لانسر.. 4 خطوات لحماية حسابك البنكي من أي مشاكل

لو إنت بتشتغل أونلاين وبتجيلك تحويلات من بره، سواء بالدولار أو بالجنيه، وجالك يوم لقيت البنك بيبعتلك تراجع معاه حساباتك متستغربش

لأن ببساطة البنك بيكون واخد تعليمات من البنك المركزي إنه لازم يعرف كل جنيه داخل الحساب ده جاي منين، وخصوصا لو الحساب كان نايم وفجأة بقى فيه حركة، أو بقت توصلك فلوس مش مفهومة بالنسبة ليهم

ومتخافش البنك مش ضدك، بس لازم يتأكد ان الفلوس دي جاية من شغل حقيقي، مش غسيل أموال ولا حاجة مش قانونية

وخالي بالك  لو انت بتشتغل من غير ورق رسمي (يعني لا سجل ضريبي ولا بطاقة ضريبية)، فالدولة شايفة إنك بتشتغل "تحت بير السلم"، وده ممكن يسببلك مشاكل قدام

 وحتى لو بتستقبل الفلوس على حساب شخصي، البنك هيشك، لأن الحساب ده معمول للمصاريف العادية مش أرباح شغل منتظم.

 طب تعمل إيه بقى؟

شوف، لو لسه ما عملتش ورقك، محتاج تبدأ فورا، واول حاجة لازم تعملها انك تروح تطلع بطاقة ضريبية كمستقل، و اعمل سجل تجاري فردي، وافتح ملف ضريبي في الضرائب، عشان تبقى في السليم 

بعد كده، لما البنك يسألك "الفلوس دي جاية منين؟"، هتقول بثقة "أنا بشتغل أعمال حرة أونلاين، وده مصدر دخلي، وده الورق الرسمي بتاعي."

أما بقى لو البنك طلب إثبات هات سكرين شوت من مواقع زي Upwork، Freelancer، أو حتى إيميلات واتفاقات بينك وبين العميل.

او هات فواتير إلكترونية لو بتستخدم أدوات احترافية، ةأي مراسلات تثبت إنك اشتغلت فعلا

والأحسن من ده كله افتح حساب بنكي تجاري لوحده مخصوص للشغل، وسيب حسابك الشخصي في حاله، وخليك دايما موثق كل شغلك، كل تحويل، كل فاتورة، كل اتفاق

ولو دخلك بدأ يزيد، سجّل نفسك في منظومة الفاتورة الإلكترونية، علشان تبقى قانوني 100%.

وخليك عارف ان اللي بتعمله شغل محترم، ومش غلط، بس لازم تكون ماشي صح قانونيا علشان تشتغل وانت مرتاح ومحدش يعطلك