نيسان بتغرق ومفيش غير الخليج ينقذها.. هل نشهد كارلوس غصن جديد لكن بعِقال سعودي؟
لو حد قالك من 5 سنين إن نيسان ممكن تفلس أو تنهار، كنت هتضحك.. بس اللي بيحصل دلوقتي مش هزار.. الشركة خسرانة بالمليارات، تحالفاتها بتتفك، ومبيعاتها بتنهار في أهم الأسواق.. ومع انسحاب رينو، نيسان بقت وحيدة في مواجهة العاصفة.. فهل السعودية هتدخل تنقذ الموقف؟ وهل ده معناه إننا على أبواب " كارلوس غصن" جديد.. بس المرة دي بالعِقال؟
نيسان.. خسرت أكتر من 5 مليار دولار في نص سنة بس .. وده أكبر رقم خساير في تاريخ الشركة.
الأرباح التشغيلية نزلت بنسبة 85% مقارنة بالسنة اللي فاتت… يعني الشركة تقريبًا بتشتغل من غير مكسب
الطلب على عربيات نيسان في أمريكا والصين، أكبر سوقين في العالم، بينهار بسرعة غير مسبوقة
التحالف مع هوندا وميتسوبيشي فشل بعد انسحاب هوندا المفاجئ.. والبديل؟ لسه مش موجود.
رينو سحبت استثماراتها بالكامل من نيسان بعد 25 سنة شراكة، وسابتها تواجه مصيرها لوحدها وسط العاصفة
ايه القصة واللي حصل في امبراطورية اليابان اللي عربياتها كانت في كل الكوكب .. هنحكي عنه في الفيديو دا .. يلا بينا..
تخيل تصحى الصبح تلاقي خبر إن نيسان، واحدة من أعرق وأقوى شركات العربيات في العالم، على وشك الإفلاس.. نيسان اللي كانت فخر الصناعة اليابانية وعربياتها بتتباع في كل شارع على كوكب الأرض، دلوقتي بتنهار ومش لاقية طوق نجاة.. الأرقام بتنزل، الأرباح بتتبخر، والخساير بتزيد.. وفي وسط الزحمة دي، بيطلع كلام عن منقذ جديد، مش من لبنان زي كارلوس غصن… المرة دي جاي من الخليج ..أيوه، من السعودية
نيسان دخلت سنة 2025 وهي في ورطة مالية ما حصلتش قبل كده.. الإيرادات في النصف الأول نزلت لـ 5.98 تريليون ين، يعني حوالي 40 مليار دولار، وده أقل من السنة اللي فاتت بنسبة 1%.. بس المصيبة الأكبر كانت في الأرباح التشغيلية اللي نزلت بنسبة 85%، والخسارة الصافية اللي وصلت لأكتر من 5 مليار دولار، ودي أكبر خسارة في تاريخ الشركة..
يعني نيسان فعليًا في خطر حقيقي إنها تختفي من السوق لو مفيش تدخل عاجل.
بس الأرقام دي مش جديدة، دي نتيجة سنين من التراجع وسوء الإدارة بعد ما مشي كارلوس غصن.. الطلب على عربيات نيسان قل بشكل واضح في أسواق كبيرة زي أمريكا والصين، والمنافسة بقت مرعبة من الشركات الصينية اللي بتطلع عربيات كهربا أرخص وأشيك وأسرع، زي BYD وNIO. غير كده، تكلفة إعادة الهيكلة لوحدها زادت عن 400 مليون دولار، والشركة اضطرت تعمل تخفيضات كبيرة في قيمة أصولها في أكتر من سوق.
نيسان حاولت تطفي الحريقة بقرارات صعبة، سرّحت 9000 موظف، قللت الإنتاج بنسبة 20%، باعت جزء من حصتها في ميتسوبيشي عشان تدخل سيولة، وقفلت مصانع في إندونيسيا وإسبانيا. بس كل ده ماكانش كفاية. وبدل ما تلاقي دعم، خدت ضربة جديدة لما رينو، الشريك الفرنسي القديم، سحبت استثماراتها وسابتها تواجه مصيرها لوحدها.
بعد انسحاب رينو، نيسان حاولت تعمل تحالف جديد مع هوندا وميتسوبيشي، وفكرت في تأسيس شركة قابضة يابانية تجمع التلاتة، لكن فجأة هوندا انسحبت والمفاوضات فشلت، وبكده نيسان رجعت لنقطة الصفر تاني. ووسط ده كله، طلع كارلوس غصن يتكلم، وقال إن اللي بيحصل ده نتيجة "إدارة فاشلة بعد ما مشيت"، وإن نيسان خسرت أكتر من 50 مليار دولار من 2018 لحد دلوقتي، ورفع عليهم قضية في لبنان بيطلب فيها مليار دولار تعويض!
الغريب بقى إن فيه تقارير بدأت تتكلم عن دخول صندوق الاستثمارات العامة السعودي (PIF) في مفاوضات مع نيسان، بهدف إنه يستثمر فيها بشكل استراتيجي خلال سنة من دلوقتي. يعني فيه احتمال نيسان تلاقي منقذ جديد .. بس المرة دي بعِقال خليجي.. الكلام ده لو حصل، ممكن يقلب موازين السوق، ويبقى بداية جديدة لنيسان، أو محاولة أخيرة قبل الغرق.
في الآخر، نيسان دلوقتي مش بس بتمر بأزمة مالية، دي بتواجه لحظة وجود. يا هتلاقي اللي يسندها وتعيد اختراع نفسها، يا هتنضم لقائمة الشركات اللي التاريخ بس بيفتكرها. والسؤال اللي بيدور في عقول كتير: هل الخليج هيبقى المنقذ الجديد؟ ولا نيسان هتغرق والمرة دي من غير غصن ينقذها.
