مش هنستورده تاني.. نجاح أول تجربة زراعة للأرز البسمتي في مصر
تفتكر لو في فلاح في قرية صغيرة قدر يزرع "الأرز البسمتي" اللي طول عمرنا بنستورده من بره بملايين الدولارات، ويطلع بنفس الجودة وأحسن كمان.. إيه اللي ممكن يحصل
بس فعلا فيه مهندس زراعي قلب مصر بتجربة زراعة الأرز البسمتي اصل الموضوع مش مجرد رز وبس دي ملايين هنوفرها للبلد
ازاي التجربة دي نجحت والمهندس ده قدر يغير قواعد الزراعة في مصر ده اللي هتعرفه معانا دلوقتي
زراعة الأرز
القصة بدأت من مهندس زراعي اسمه محمد موسى، راجل عنده ٥١ سنة من قرية اسمها "الربع" في مركز منتفخ على تمي الأمديد بمحافظة الدقهلية
محمد كان شايف إن الأرز البسمتي سعره غالي جدًا، والناس بتستورده من بره بالعملة الصعبة، فقال لنفسه: "هو ليه منزرعوش هنا في مصر ونوفر الفلوس دي ونكفي نفسنا؟"
الراجل قعد يدور على الإنترنت ويقرأ عن الأرز البسمتي، وعرف إنه بيتزرع في باكستان والهند ومن هنا بدأ يفكر إزاي يجيب التقاوي، وفعلاً واحد من قرايبه اللي شغال في الكويت قدر يجيبلُه ٣ كيلو تقاوي من العمالة الباكستانية والهندية اللي هناك.
محمد خد التقاوي وزرعها في أرض صغيرة كده كتجربة.
أول سنة جرب، تاني سنة كمل، ولقى النتائج مبشرة جدًا الأرز طلع بجودة عالية جدًا، والسنبلة الواحدة فيها أكتر من ٢٥٠ حباية يعني الفدان الواحد بيجيب من ٣ لـ٤ طن، وده إنتاج محترم جدًا مقارنة بالأرز المصري العادي.
ولما شاف النجاح ده قال خلاص، هجرب على مساحة أكبر فزرع فدان ونص بسمتي. وكانت المفاجأة المحصول طلع ممتاز. مش بس كده الأرز البسمتي وفر معاه مياه بشكل رهيب، لأنه بيتسقي كل أسبوع تقريبًا، مش زي الأرز المصري اللي محتاج غمر مياه على طول وده معناه نص استهلاك المياه.
موسى قال إن السماد اللي بيحتاجه أقل بنسبة ٣٠٪ تقريبًا، ومدة زراعته أقصر بحوالي ٢٠ يوم من الأرز المصري يعني بتكسب وقت، وبتكسب محصول، وبتوفر مياه وسماد.
بس موقفش هنا ده قرر يتوسع اكتر وبدل ما كان بيزرع الرز مرة واحدة في السنة بقى بيزرعه مرتين طبعا ساعتها كان متردد انهزيخسر بس قال لو التجربة دي نجحت الفلاح هيكسب ضعف الفلوس، وهيكون فيه اكتفاء ذاتي من الأرز البسمتي، وممكن كمان نصدر بدل ما نستورد.
وفعلا التجربة نجحت والناس طبعًا أول ما شافوا التجربة ناجحة، التجار عرضوا عليه يشترو المحصول بمبالغ كبيرة جدًا علشان يزرعوا مساحات أكبر. بس محمد رفض وقال "أنا عايز المحصول الأول يكون تقاوي للفلاحين، علشان نزرعه كلنا وننشر الفكرة في ربوع مصر."
النجاح ده مش وقف عند الدقهلية بس، لأ التجربة بدأت تنتقل لمحافظات تانية زي الشرقية والغربية والبحيرة يعني الموضوع بقى بيتوسع شوية بشوية.
والنهاردة في مزارعين كتير بيكلموا محمد علشان يساعدهم يزرعوا الأرز البسمتي في أراضيهم. وهو فعلاً مستعد يساعدهم وينشر الفكرة.
موسي قال إن لو التجربة دي اتعممت، هنكون وفرنا ملايين الدولارات اللي بتتصرف على الاستيراد، وكمان هنكون عندنا منتج عالي الجودة مطلوب في العالم كله.
محمد موسى أثبت إن فكرة صغيرة وإصرار ممكن يغيروا واقع بلد كاملة.