السيارات نزلت ربع مليون جنيه.. 3 أسباب ورا الانخفاض.. وده أنسب وقت للشراء
سوق العربيات في مصر دخل على موجة تخفيضات غير مسبوقة.. أكتر من 25 طراز نزل سعرهم في آخر شهرين، التخفيضات وصلت لحد ربع مليون جنيه
حرفيا السوق كله مقلوب واي حد بيفكر يشتري يلحق دلوقتي
بس ياترى أسعار العربيات وصلت لكام وايه سبب الانخفاض ومصيرها ايه الايام الجاية.. يلا بينا عشان نعرف الحكاية
تخفيضات السيارات
سوق العربيات في مصر الأيام دي عامل زي البحر، كل يوم فيه موجة جديدة، والموجة اللي شغالة دلوقتي بقى هي موجة التخفيضات، واللي أي حد مهتم بالعربيات بقى مشغول بيها ومتابعها لحظة بلحظة.
التجار والوكلاء أعلنوا عن تخفيضات كبيرة جدًا على أنواع كتير من العربيات، من أول العربيات الصغيرة الاقتصادية اللي معظم الناس بتدور عليها عشان تبقى في المتناول، لحد العربيات الكبيرة العائلية والـ SUV الضخمة اللي بقت حلم أي بيت كبير.
انت متخيل إن فيه عربيات نزل سعرها 20 أو 30 ألف، وفيه اللي نزل 100 ألف، وفيه اللي نزل ربع مليون جنيه كامل، وطبعا دي ارقام خلت السوق كله يتقلب
طيب هو ليه حصل كده؟
الموضوع ليه كذا سبب. أول سبب إن الدولار اللي كان طاير وصل لـ 53 جنيه، بعدين رجع نزل وبقى حوالي 48 جنيه. الفرق ده انعكس على تكلفة العربيات اللي بتيجي من بره، لأن أي عربية مستوردة مرتبطة بسعر الدولار.
السبب التاني إن مصر بقى عندها 8 خطوط إنتاج جديدة للعربيات اللي بتتجمع محلي. يعني إيه؟ يعني الشركات بقت بتصنع جزء كبير من العربيات جوه البلد بمكونات محلية، وده بيخلي التكلفة أقل بكتير من العربيات اللي جاية جاهزة من بره. فالوكلاء اللي بيجيبوا العربيات المستوردة مالهمش حل غير إنهم ينزلوا أسعارهم عشان ما يخسروش حصتهم في السوق.
وكمان دخول شركات صينية جديدة بأسعار منافسة جدًا زود الطين بلة، فالوكلاء الحاليين اضطروا يراجعوا أسعارهم بسرعة.
أما بخصوص اسعار العربيات دلوقتي فأنت عندك مثلًا سيات اسعارها نزلت 100 ألف لموديل ليون أما إبيزا 70 ألف، و أرونا 30 ألف، وأتيكا أكتر من 100 ألف.
أما هيونداي إلنترا AD.كل فئة نزلت 50 ألف وشيريزتيجو 4 برو نزلت من 25 لحد 75 ألف، و eQ7 الكهربائية نزلت 121 ألف، والتيجو 7 نزلت من 66 لحد 81 ألف.
أما إكس بينغ عربية G6 نزلت من 140 لحد 180 ألف، والـ G9 فقدت من 100 لحد 200 ألف.
أوبل: الكورسا نزلت 130 ألف، الموكا 100 ألف، والجراند لاند لحد 100 ألف، وبيجو: الموديلات 3008 و5008 نزلت من 100 لحد 150 ألف.
كمان رينو الداستر نزلت 85 ألف، والميجان لحد 160 ألف.
يعني الموضوع مش بس تخفيض هنا وهناك.. لا، ده موجة كاملة ضاربة السوق كله.
منتصر زيتون، عضو مجلس إدارة شعبة السيارات، بيقول إن السوق من أول السنة ماشي في اتجاه التصحيح السعري، يعني الأسعار اللي كانت مولعة رجعت تنزل تاني بنسبة من 10 لـ 30%. وأكبر جزء من التخفيضات دي كان في آخر 3 شهور.
هو كمان وضح إن الموضوع سببه 3 حاجات. استقرار سعر الصرف ونزول الدولار، وزيادة خطوط الإنتاج المحلي اللي بتخلي التكلفة أقل، و دخول علامات صينية جديدة منافسة.
ومن ناحية تانية، خالد سعد، الأمين العام لرابطة مصنعي السيارات، قال إن الفئة الاقتصادية هي اللي واخدة أكبر نصيب من التخفيضات، لأنها حوالي 70% من المبيعات ومجمعة محلي. وده خلق ضغط على العربيات المستوردة اللي تحت المليون جنيه.
كمان قال إن الأسعار ممكن تفضل في اتجاه النزول الفترة الجاية، خصوصًا مع قرب نهاية السنة وظهور موديلات 2026، والوكلاء لازم يصرفوا مخزون 2025، فطبيعي نشوف عروض خاصة وتخفيضات إضافية.
يعني لو هنجمع الكلام كله، هنلاقي إن اللي بيحصل دلوقتي مش مجرد عروض عابرة، لأ، ده اتجاه عام في السوق، وكل ما الشركات تتنافس أكتر كل ما الأسعار هتنزل. بس في نفس الوقت في مستهلكين كتير بيفضلوا يستنوا، عشان متوقعين نزول أكبر.
وفي الآخر تقدر تقول إن اللي بيحصل فرصة للي عايز يشتري عربية، بس محتاج يوازن بين إنه يلحق التخفيضات الحالية أو يستنى اللي جاي.